دەم پارتی داخوازەکێ ژ تورکیا دکەت
تونجەر باکرهان هەڤسەرۆکێ دەم پارتی دیار کر، ل سووریێ تنێ هێزا کو بەرگریێ ل مافێن مرۆڤی دکەت و هێزەکا پێشکەفتیە کوردن و هەسەدە ژی وەکو هێزەکا سەربازی یا کوردان و عەرەبان و پێکهاتەیێن دی شیایە هەتا نها دەڤەرێن ل ژێر کۆنترۆلا رێڤەبەریا خوەسەر یا رۆژئاڤایێ کوردستانێ دا بپاێزیت و هەتا نها هەسەدێ چو مەترسی بۆ تورکیا دروست نەکرینە، هەسەدە و رێڤەبەریا خوەسەر دخوازن پەیوەندیێن خوە ل گەل تورکیا ژی باش بکەن، ژ بەر ڤێ یەکێ دڤێت تورکیا پێداچوونێ د سیاسەتا خوە دا ل هەمبەر کوردێن سووریێ بکەت.
هەڤسەرۆکێ دەم پارتی دیار کر، نابیت تورکیا ب بەهانەیێن جودا جودا دوژمناتیا کوردێن سووریێ بکەت، دڤێت تورکیا پشتەڤانیێ ل کوردان بکەت، چونکی کورد مەترسی نینن بۆ تورکیا، تورکیا دشێت پەیوەندیێن گەلەک باش ل گەل کوردێن سووریێ دروست بکەت، ژ بەر ڤێ یەکێ ژی وەکو دەم پارتی داخواز ژ تورکیا دکەین پێداچوونێ د سیاسەتا خوە یا ل هەمبەر کوردێن سووریێ دا بکەت.
