28 جادەیێن ناڤخۆیی ل كۆمەلگەها قەدشێ دهێنە قێركرن
ئامێدیێ، مەحمود نهێلی:
ژ بۆ پتر گرنگیدان ب دەڤەرێن دووری دەست و گەهاندنا خزمەتگوزارییان بۆ كۆمەلگەهـ و گوندان، پڕۆژەیێ چێكرنا جادەیێن ناڤخۆیی ل كۆمەلگەها قەدشێ گەهشتە قووناغێن داویێ و دەست ب قێركرنا وان هاتە كرن.
رێڤینگ عادل، سەرۆكێ باژێرڤانیا قەدشێ بۆ رۆژناما ئەڤرۆ دیار كر، پڕۆژەیێ چێكرنا جادەیێن ناڤخۆیی ل كۆمەلگەها قەدشێ ئێك ژ وان پڕۆژەیان بوویە، یێن ئەڤ سالە دەست ب چێكرنا وان هاتیە كرن و گۆت: «ئەڤ پڕۆژەیە ژ چێكرنا 28 جادەیێن ناڤخۆیی ل هەژمارەكا تاخێن كۆمەلگەهێ پێك دهێت، كو درێژاهیا وان دگەهیتە سێ كیلۆمەتران و 500 مەتران».
گۆتژی: «ژ بۆ ئەنجامدانا ڤی پڕۆژەی گوژمێ 906 ملیۆن دیناران ل سەر بودجەیا تایبەتا پارێزگەها دهۆكێ هاتبوونە تەرخانكرن و گۆت: «نوكە ئەڤ پڕۆژە گەهشتیە قووناغێن دوماهیێ و دەست ب قێركرنا وان هاتیە كرن، دیسا هەژمارەكا دی ژی یا پڕۆژەیان نوكە ل دەڤەرێ دهێنە بجهئینان».
