دیزاینەرێن كورد رۆلەكێ مەزن د دانە نیاسینا كلتۆرێ كوردی دا هەبووینە
دلڤین رەشید:
دیزاینەر (ڤەژین جەسیم) د دیدارەكێ بۆ رۆژنامەیا ئەڤرۆ دیاركر كو ئەو خەلكا باژێرێ دهۆكێ یە دەرچۆیا زانكۆیا ئەمریكی یە، پشكا ئەندازیاریا دیزاینا ناڤخۆی یە، هەروەسا پەیمانگەها تەكنیكی ل زاخۆ ژی تەمامكریە و نوكە ژی كارێ دیزاینا جلوبەرگێن كوردی دكەت و خودانا كارێ خوە یێ تایبەتە.
ناڤهاتیێ گۆت: هەر ژ زارۆكینیێ من حەزا كارێ دیزاینێ هەبوو، ئەو بوو هێدی هێدی مە خوە فێری كارێ دروارێ كر ژبۆ هندێ پتربشێم بەرەف ئارمانجا خوە ڤە بچم، ئەو بوو من كارێ دیزاینا جل و بەرگێن كوردی هەلبژارت، داكو بشێم خزمەتا كلتۆرێ خوە یێ كوردی بكەم و هەتا رادەیەكی ئەز شیامە دكارێ خوە دا یا سەركەفتی بووم، چونكی دیزاین نە بتنێ بۆ من كارە بەلكو ژیانا من بەرەف گۆهاڕتنێن مەزن ڤە بریە و ب دیتنا من ژنێن دیزاینەرێن كورد رۆلەكێ مەزن هەبووینە بۆ دانە نیاسینا كلتۆرێ كوردی دا و ئەڤێ چەندێ ژی هێز و شیانێن ژنا كورد بەرچاڤكرینە و دخوازم ل پاشەرۆژێ كارێ خوە بەرفرەهتر لێ بكەم داكو بشێم دەلیڤەیێن كاری بۆ ژنان دابینبكەم، هەرچەندە ژمارەیەكا ژنان نوكە دگەل من كاردكەن، بەلێ دخوازم زێدەتر لێ بكەم ، هەروەسا ب رێكا كارێ خوە دخوازم پەیاما جوانی و ناسنامە و كلتۆرێ كوردی بدەمە دیاركرن و هەر كەسەكی ڤان جلكان بكەتە بەرخوە هەست ب جوانی و شانازیا كلتۆرێ رەسەنێ كوردی بكەت.
