فەستیڤالا سێیێ یا هنار و هنگڤینی ل زاخۆ هاتە ڤەكرن
زاخۆ، دلۆڤان هالۆ:
ب ئامادەبوونا سەربەست لەزگین، بەرپرسێ مەكتەبا ڕێكخستنا پارتی ل پارێزگەها دهۆكێ و عومەر ئۆرەی، بەرپرسێ لقێ هەشت یێ پارتی ل زاخۆ، ب چاڤدێریا گوهدار شێخۆ، سەرپەرشتێ ئیدارا سەربخوە یا زاخۆ، دوهی 20/10/2025 ل ژێر درووشمێ (چاندن بنەمایێ پێشكەفتن و زێدەكرنا بەرهەمییە) سێیەمین فەستیڤالا هنار و هنگڤینی ل كۆڕنیشێ پرا دەلال هاتە ڤەكرن.
گوهدار شێخۆ، سەرپەرشتێ ئیدارا سەربخوە یا زاخۆ د كۆنگرەیەكێ ڕۆژنامەڤانی دا گۆت: «خوەشحالین ب ڤەكرنا سێیەم فەستیڤالا هنار و هنگڤینی ل زاخۆ، جۆتیاران ڕۆلەكێ باش هەبوویە، كو بەرهەمێ ناڤخۆ ژ ناڤ نەچیت و كارەكێ ڕژد دكەن ژ بۆ زێدەكرنا بەرهەمێ ناڤخۆ».
گۆتژی: «هنارێن زاخۆ، ژ هنارێن هەڕە باشن ل سەر ئاستێ كوردستانێ و ئیراقێ، كۆمپانیەكا تایبەت دێ هنارێن ئەڤ سالە ژ جۆتیارێن زاخۆ كڕیت و بۆ ناڤخۆیا ئیراقێ و دەرڤەی وەلاتی ڤڕێكەت، هنگڤینێ زاخۆ ژی بكڕێن خوە یێن تایبەت هەنە، چونكی هنگڤینێ كوردستانێ بوویە بڕاندەك ل سەر ئاستێ ئیراقێ«.
د ڤێ فەستیڤالێ دا 15 خیڤەتێن هنگڤینی و 17 خیڤەتێن هنارێن بناڤودەنگ یێن زاخۆ هاتینە دانان.
