فەستیڤالا سێیێ یا بەرهەمێن خۆمالی ل دەڤەرا بەرواری بالا هاتە گێڕان
ئامێدیێ، مەحمود نهێلی:
ژ بۆ گرنگدان ب چاندنێ و پشتەڤانیكرنا بەرهەمێن خۆمالی یێن دەڤەرێ و پێشڤەبرنا كەرتێ چاندنێ ل سنۆرێ دەڤەرداریا ئامێدیێ، ل ژێر چاڤدێریا د. عەلی تەتەر، پارێزگارێ دهوكێ و ب بەرهەڤبوونا بەهرام عریف یاسین، بەرپرسێ لقێ 18 یێ پارتی ل ئامێدیێ و رێڤەبەر و بەرپرسێن دام و دەزگەهێن میری و حزبی و كەسایەتی و وەلاتی و جۆتیار و گەشتیاران و خەلكێ كوردستانێ ل رۆژا ئەینی 24/10/2025 گەرا سێیێ یا فەستیڤالا بەرهەمێن خۆمالی ل بەرواری بالا ل سنۆرێ ناوچەدارییا كانی ماسێ دەستپێكر و بۆ دەمێ چار رۆژان دێ یا بەردەوام بیت و تێدا هەژمارەكا زۆرا بەرهەمێن خۆمالی و برگێن هونەری و فولكۆری هاتنە نیشادان.
بەهرام عریف یاسین، بەرپرسێ لقێ 18 یێ پارتی د پەیڤەكێ دا ئاماژە دا گرنگیا ڤان جۆرە فەستیڤالان و ئەو تەناهیا ئەڤرۆ ل دەڤەرێ هەی و گرنگیا هەبوونا پارتی ل بەغدا و گۆت: «هەتا كوردستان یا سەقامگیر بیت و ئەمنیەت بەرقرار بیت و دەستكەفت پاراستی بن و پێشڤەچوون بەردەوام بیت دڤێت پارتی ل بەغدا یا ب هێزبیت، ئەڤە ژی دێ ب دەنگێن هەوە دروست بیت، ژ بەر وێ یەكێ داخواز دكەین دەنگی بدەنە لیستا 275 یا پارتی، لیستا شەهیدان، لیستا خۆراگریێ، لیستا هەموو خەلكێ كوردستانێ».
ناڤهاتی د پەیڤا خۆدا دەستخۆشی ل وان گەنج و كەسان كر، یێن ب كارێ برێڤەبرنا ڤێ فەستیڤالێ رابووین و هیڤی خواست، كو سال بۆ سالێ باشتر و بەرفرەهتر لێ بهێت و گۆت: «دار و بار و ئاڤ و كانی و رووبار و چیا و دۆل و نهالێن ڤێ دەڤەرێ ژ لایێ مە ڤە د پیرۆزن، چونكی بۆ پاراستنا وان مە قوربانیێن مەزن داینە و ئەڤ دەڤەرە دەڤەرا تۆمارا داستانایە».
فەستیڤالا بەرهەمێن خۆمالی بۆ سالا سێیێ یە ل سەر ئێك ل بەرواری بالا برێڤەدچیت، سازكرنا ڤێ فەستیڤالێ ژی هاندان و پشتەڤانیە بۆ جۆتیارێن دەڤەرێ ژ بۆ ساخكرنا بەرهەمێن خۆمالی و سالانە ژی هەژمارا سەرەدانیكەرێن فەستیڤالێ زێدەتر لێ دهێتن.
