باشترین و ئارامترین بانگەشەیا هەلبژارتنان ل دهۆكێ دهێتە كرن
د. عەلی تەتەر، پارێزگارێ دهۆكێ دوهی 27/10/2025 سەرپەرشتیا كۆمبوونا لیژنا ئەمنی ل پارێزگەهێ كر و گۆت: باشترین بانگەشەیا هەلبژارتنان ل سەر ئاستێ ئیراقێ ل دهۆكێ دهێتە كرن.
پارێزگاری د كۆمبوونێ دا بەحسێ رەوشا ئەمنی ل پارێزگەهێ و هەوا هەلبژارتنێن پەرلەمانێ ئیراقێ و ئەو ئامادەكاریێن ژ لایێ دەزگەهێن پەیوەندیدار هاتینە كرن، بۆ وێ یەكێ بانگەشە ب رەنگەكێ ئارام و شارستانی بهێتە ئەنجامدان، هاتە كرن.
پارێزگارێ دهۆكێ د كۆنگرەكێ رۆژنامەڤانی دا گۆت: «بانەگەشەیا هەلبژارتنان ب شێوەكێ ئارام و ئاسایی و ل دووڤ رێنما و یاسایێن كۆمسیۆنا هەلبژارتنان دهێتە ئەنجامدان و هەتا نوكە چو كیانان و لایەنێن سیاسی چو سكالا تۆمار نەكرینە، مە لایەنێن ئەمنی راسپاردینە پێرابوونێن یاسایی بەرامبەر هەر سەرپێچییەكێ وەرگرن، ئەم دخوازین هەموو لایەن بانگەشەیا خۆ ب رەنگەكێ ئارام و شارستانی و دیموكراسی بكەن، وەكو هەر جار روویێ جوان یێ پارێزگەها دهۆكێ نیشا خەلكێ هەرێمێ و ئیراقێ و بیانی ب دەن».
