هەبوونا كچان د رێڤەبرنا وەرزشێ دا
نەهلا ئەحمەد
هەبوونا كچان د وەرزشێ پێنگاڤەكا هەرەباش و دلخوشكەرە بۆ مە هەمی كچێن وەرزشڤان ژ بەركو ئێدی ئەم هەست ب هندێ دكەین كۆ هەبوونا مە د رێڤەبەریێ دا د لژنەیێن وەرزشی دا د چالاكیێن وەرزشی دا بەر ب زێدەبوونێ و گرنگیپێدانێ دچیت و كچێن وەرزشڤان بووینە جهێ گرنگیێ ل دەف یانە و بەرپرسێن مە یێن وەرزشی ل دهۆكێ ئەڤە ژی وێ چەندێ دگەهینیت كۆ كچا وەرزشڤان مل ب ملێ رەگەزێ نێر دێ خزمەتا وەرزشا پارێزگەها دهوكێ و ب تایبەت وەرزشا كچان كەت، هەگەر ئەم تەماشە بكەین ژی ل پارێزگەها دهوكێ مە گەلەك كچێن وەرزشڤان و خودان شیان و ئەكادیمی د وەرزشێ دا هەنە و دشێن ب باشترین و جوانترین شێوە كارێ وەرزشی ل رێڤەبەریێن یانەیان و ل لیژنەیێن وەرزشی و چالاكێن وەرزشی برێڤە ببەن و ببنە جهێ مفایی بۆ وەرزشێ و وەرزشڤانان، ئەڤچا یا گرنگ ل ڤێرێ ئەوە مادەم گرنگی ب مە رەگەزێ مێ هاتە دان و دەرگەه بۆ مە هاتنە ڤەكرن یا پێدڤیە ئەم ژی ب باشترین شێوە خزمەتا وەرزشێ و وەرزشڤانان بكەین ب تایبەت ژی وەرزشا كچان و یانەیێن كچان ژ بەر كو جهێ خوشحالیێ یە كو ل ڤێ داویێ یانەیێن كچان ل پارێزگەها دهوكێ و ئیدارا سەربەخۆیا زاخۆ بەر ب زێدەبوونێ چووینە و كچێن وەرزشڤان هاتینە د مەیدانێ دا ئەڤچا پێدڤیە ئەو كچێن ئەركێن وەرزشی وەرگرتین دڤێت خۆ ل ڤان كچان بكەنە خۆدان و شیانێن وان بەرەڤ باشتر ڤە ببەن و ببنە باشترین پشتەڤان داكۆ وەرزشا كچان وەكو یا كوران بەرەڤ پێشڤە بچیت، یا من دڤێت بێژم سوپاس بۆ فدراسیۆنا فوتبۆلا پارێزگەها دهۆكێ كو د هەلبژارتنێن ئەڤچارە دا گرنگی ب كچا وەرزشڤان دایە و دگەل ستاڤێ خۆ هەلبژارتیە بۆ هندێ خزمەتا یانەیێن كچان و وەرزشا پارێزگەها دهوكێ و ئیدارا سەربەخۆیا زاخۆ بكەت و سوپاس بۆ یانەیا دهۆك كو ئەوانژی كچەك دگەل ستاڤێ خۆ یێ نوو هەلبژارت پێخەمەت خزمەتا وان كچێن وەرزشڤان بكەت یێن دیاریگەهێ دا بەرهەڤ دبن.
