مە چالنجا جەنابێ نێچیرڤـان بـارزانـی قـەبیلكر
ئارام حاجی عەلی
ڕێزدار نێچیرڤان بارزانی، جێگرێ سەرۆكێ پارتی دیموكراتی كوردستان و سەرۆكێ هەرێما كوردستانێ، د ڤان دەمێن داویێ دا، داخوازەكا گرنگ و دلێرانە ئاراستەی گیانێ ب جۆش و خرۆشا لایەنگر و ئەندامێن حزبێ خۆ كر و گوت: «ڤێ جارێ دێ دەنگێن پارتی گەهینینە ئێك ملیۆن دەنگ!» ئەڤ گۆتنە، نە بتنێ وەك ئارمانجەكا هەلبژارتنێ دهێتە سەحكرن، بەلكو وەك چالەنجەك، وەك ئەركەكێ نیشتمانی و پەیامەكێ سیاسی یێ كورت و پڕ ناڤەرۆك دهێتە پێشكێشكرن كو د شیاندایە كاریگەرییەكا بەرچاڤ ل سەر داهی و دیاركرنا نەخشەرێژا سیاسی یا داهاتی یا هەرێما كوردستانێ هەبیت. مە، وەك دەنگ و ڕەنگێ جەماوەرەكێ فراوان، ڤێ چالەنجا وە ب دلڤەكری و ب گیانەكێ پڕ ئومێد قەبوول كر.
ئەڤ چالەنجە، نە بتنێ ژمارەك تبلێ كو د سندۆقێن دەنگدانێ دا بهێتە كۆمكرن. بەلكو ڕەنگڤەدانا ئیرادەیەكا بهێزە بۆ بەردەوامیدان ب پرۆسەیا دیموكراسی و جێگیركرنا سەقامگیریا سیاسی و ئابووری ل هەرێما مە. پارتی دیموكراتی كوردستان، وەك مەزنترین و ریشەدارترین حزبا سیاسی ل كوردستانێ، هەردەم ڕۆلێ پێشەنگ یێ د قۆناغێن جودا جودا دا گوهۆڕی. ژ دەما خەباتا چەكداری و شۆڕشگێری ڤە بۆ دەما ئاڤاكرنا دامودەزگەهێن حوكمرانیێ و پاراستنا قەوارەیا هەرێمێ، پارتی هەردەم وەك هێزەكا ناڤەندی و ئێكلاكەر دەركەفتییە. ڤی مێژوویێ پڕ ژ قوربانیدان و دەستكەفتان، بنەمایێ باوەریا جەماوەرە بۆ ب دەستڤەئینانا وێ ئارمانجێ كو نها هاتییە دیاركرن.
لێ گەهشتن ب ئێك ملیۆن دەنگان، پێدڤی ب بتنێ مێژوویەكا پڕشنگدار نینە. پێدڤی ب پلانەكا زانستی و ب وریای، كاركرنەكا چڕ و پڕ، نووبوونەكا گۆتارا سیاسی و گرنگیدانەكا زێدەتر ب داخواز و مافێن جەماوەر هەیە. ئەڤ چالەنجە، دەرفەتەكە بۆ پارتی دا جارەكا دی خۆ نووی بكەت و بەرسڤدەرێ پێدڤیێن سەردەمی بیت.
ژ ئالیێ سیاسی ڤە، ب دەستڤەئینانا ئێك ملیۆن دەنگان، رامانا بەرفرەهبوون و ب قوولبوونەڤەیا پێگەها پارتی یە د جڤاكێ دا. ئەڤە دشێت پەیامەكێ بهێز بیت بۆ لایەنێن ناڤخۆیی و دەرەكی، كو پارتی هێشتا هێزەكا بێ ڕكابەرە و شیانێن كۆمكرنا زۆرترین دەنگان هەیە. ئەڤ چەندە ژی ب شێوەیەكێ ئەرێنی كاریگەری ل سەر هەڤكێشێن سیاسی دێ هەبیت و پێگەها دانوستاندنكاریا پارتی دێ بهێزتر كەت، ب تایبەت د ڤێ قۆناغا هەستیار یا نوكەیا ئیراقێ و دەڤەرێ دا.
ژ ئالیێ جڤاكی ڤە، گەهشتن ب ڤێ ئارمانجێ، رامانا پەیامەكە كو خەلكێ كوردستانێ باوەریا ب پڕۆژێ سیاسی یێ پارتی هەیە و حەز ژ بەردەوامیدانێ ب وێ ڕێبازێ دكەت كو بۆ ژیانەكا باشتر و ئایندەیەكێ گەشتر خزمەت بكەت. ئەڤە پێدڤی ب وێ چەندێ یە كو پارتی زێدەتر گوهێ خو بدەتە داخواز و مافێن گەنجان، ژنان، توێژێن جودا یێن جڤاكێ و د پڕۆژە و پلانا داهاتی یا خو دا ڕەنگڤەدانا وان هەبیت. خەلك دڤێت بزانن كو دەنگێ وان دێ چەند كاریگەر بیت ل سەر ژیانا وان.
پاراستنا ئێكگرتنا ناڤخۆیی، شەفافیەت د بڕیار و كاران دا و ڕوو ب ڕووبوونەوەیا كێشەیێن ئابووری و خزمەتگوزاری وەك بێكاری، گەندەلی، و كێشەیێن ژیارێ، فاكتەرێن سەرەكینە بۆ وەرگرتنا باوەریا جەماوەری. پارتی پێدڤی یە ب ڕوونی نیشا بدەت كا چاوا دێ شیانێن خۆ بۆ چارەسەركرنا ڤان كێشەیان و باشتركرنا ژیانا وەلاتیان بكاربینیت.
ب كورتی چالەنجا بەڕێز نێچیرڤان بارزانی، نە بتنێ ئارمانجەكا هەلبژارتنێ یە، بەلكو قۆناغەكا نووی یە بۆ پارتی كو پێگەها خۆ ب جەماوەرێ ڤە بهێزتر بكەت. قەبوولكرنا ڤێ چالەنجێ، رامانا وێ یە كو مە وەك خەلك، باوەری ب شیان و ئیرادەیا خۆ هەیە كو پێكڤە بشێین ڤێ ئارمانجێ ب دەستڤەبینین. دێ دگەل وە پێكڤە كاركەین و ب هەڤكاریك و هەڤدلی، ئەم دێ ڤێ چالەنجا وە ب سەركەفتیانە ب دوماهی ئینین. ئومێد دكەین كو ڤێ جارێ، دەنگێن پارتی ب ڕاستی بگەهنە ئێك ملیۆن دەنگ و ببینە بەلگەیەك بۆ وی پڕۆژەیێ سیاسی یێ نیشتمانی كو هەردەم پارتی و پێشەنگێن وێ هەلگرێ وێ بوون. ئایندەیا گەشتر بۆ كوردستانێ، ب پشتیوانیا دەنگێ جەماوەرێ مەزنێ ڤی وەلاتی.
