هـەلبژارتنا پـارتـی گـەرەنتیا پـاراستنا هـەرێما كـوردستانـێ یە
ئومێد وەلاتی
هەلبژارتن گولپیتكا پرۆسەیا دیموكراسیێ یە، هەر هەرێم و وەلات و كیانەكێ دیموكراسی، پێخەمەت بەردەوامیدان ب سیستەمێ خۆ یێ حوكمڕانیێ پرۆسەیا هەلبژارتنان بۆ وێ گرنگترین ئامرازێ سیاسییە، پشتی دامەزراندنا حوكمەتا هەرێما كوردستانێ ئەڤ پرۆسا هەنێ ژ بۆ دامەزراندن و پێكئینانا پەرلەمان و كابینەیا حكومی هاتە ئەنجامدان و ل دویڤدا پشتی ژناڤچوونا ڕژێما ئیراقێ، هەرێما كوردستانێ وەك پێكهێنەرەكێ سەرەكی یێ دەولەتا فیدرالی یا ئیراقێ د هەلبژارتنێن ئەنجوومەنێ نوونەرێن ئیراقێ دا پشكداربوویە، د ناڤ وان قەوارە و ئالیێن سیاسی دا كو ل هەلبژارتنان پشكداربووینە، پارتی دیموكراتی كوردستان ئێك بوویە ژ وان هێز و لایەنێن سیاسی كو ل هەمی هەلبژارتنان دا سەركەفتنەكا باش ب دەستڤەئینایە، ئەوژی ب ڕێكا باوەریپێدانا خەلكێ كوردستانێ ب پارتی ژبەر بەڕەڤانیكرنا ب هێز و ڕژد یا پارتی ل سەر هەمی مافێن گەلێ كوردستانێ د ئیراقا فیدرال دا.
پرسیار ل ڤێرە ئەوە، ئەرێ برچی د ناڤ هەمی دانوستانێن د ناڤبەرا هێزێن سیاسی یێن ئیراقێ دا ل گەل پارتێن سیاسی یێن كوردستانێ دا ئالیێن سیاسی یێن ئیراقی (عەرەب) دكارن هەمی وان ئەجێندا و مەرەمێن خۆیێن سیاسی و نەتەوەیی ل هەنبەری كوردستانێ بجهبینن، لێ دەما پارتی دیموكراتی كوردستان د ناڤ وان دانوستاندنان دابیت نەشێن خواستەك و ئارمانجێن خۆ ب سەر هەرێما كوردستانێ و قەوارەیێ هەرێمێ دا بسەپینن؟
ئەڤە بۆ وێ چەندێ دزڤریت كو پارتی و ب تایبەت سەرۆك مەسعود بارزانی چ جاران د بەرهەڤ نەبووینە بچویكترین سازشێ ل سەر مافێن گەلێ كوردستانێ بكەن و دانەپێشیا بەرژەوەندیێن نەتەوەیی ل پێش بەرژەوەندیێن خۆ یێن حزبی هەردەم باڵاترین سیاسەتا وان بوویە، كو ئەڤەژی بەروڤاژیا سیاسەت و كارێ پارت و لایەنێن دی یێن سیاسی یێن هەرێما كوردستانێ یە.
هەردەما پارتی ل گۆڕەپانا سیاسیا ئیراقێ دا یا بهێز بیت ب هەر ئاوایەكێ بوویبیت و قەبارێ باجا پێداگری و هەوڵێن وێ بۆ چەسپاندنا مافێن كوردستانیان چەند بوویبیت خۆ پاشڤە نەكشاندیە، لەوما د ڤێ هەلبژارتنا بهێت دا گرنگە هەر تاكە كوردەك سەحكەتە رابردوویێ هەمی لایەنێن سیاسی یێن هەرێمێ و بزانیت كا كیش لایەن بەرژەوەندیێن نەتەوەیی ل پێش بەرژەوەندیێن خۆ یێن حزبی داناینە، دەنگێ خۆ بدەتێ و ب دەنگێ خۆ دێ بیتە خشتەك ژ خشتێن ئاڤاكرنا دیوارەكێ موكم ل پێشیا هێز و لایەنێن ئیراقی كو دڤێن ئیرادەیا خو یا ناڤەندخوازیێ بسەپینن و قەوارەیێ هەرێما كوردستانێ بچویكتر و بچویكتر لێبكەن، ئەگەر نێرینەكا باش بۆ كار و كریارێن هەمی لایەنێن سیاسی هەبیت؛ گومان تێدا نیە كو دڤێت ب هەمی هێز و شیانێن خۆ پشتگیریا پارتی و لیستا٢٧٥ یا پارتی دیموكراتی كوردستان بكەن، داكو بكاریت وەك هەر جار ڕێگری ل خەونێن وان هێز و ئالیێن ئیراق و ناڤخۆیی یێن هەرێمێ بكەت كو مەرەما وان یا سەرەكی بچویككرن و لاوازكرانا قەوارەیێ هەرێمێ یە و ژ وێژی زێدەتر تا ئاستێ نەهێلانا قەوارێ.
ژ بۆ كوردستانەكا بهێزتر ل هەنبەر نەیارێن كوردستانێ یا گرنگ ئەوە دەنگدەر وژدانا خۆ بكەتە دادوەر و كریار و هەلوەستێن هەمی لایەنان بكەتە د تەرازویەكا دادپەروەرانە دا و ببینیت كا ل ڕۆژێن بەرتەنگ دا كێ خۆ كریە گۆری مللەتێ خۆ و نەهێلایە گەل و ئاخ بكەڤنە دەستێن شۆڤینی و تێهنیێن خوین و گیانێ كوردان وی بهەلبژێرن و باوەڕیێ بدەنێ.
بێگومان باوەڕیدان ب پارتی ب رێبەراتیا سەروك بارزانی ئەو پێنگاڤا گرنگە كو خیچ و خواریا حوكمڕانیێ ل بەغدا بهێتەڤ ڕاستكرن و سنوورەك بۆ هەر دەستدرێژیەكێ ل سەر ئاخ و گەلێ كوردستانێ بهێتە دانان.
