جهێن گشتی مولكێ هەموویانە
ئەلند مزووری
باغچێن گشتی، ئەو جهـ و بیاڤن یێن خەلكەك بگشی سەرەدانێ بۆ دكەن ب مەرەما بهێنڤەدانێ و دەربازكرنا دەمێن خۆش و ئارام، هەروەسا دبنە پشكەكا گرنگ ژ شارستانی و پێشڤەچوونا مللەتان، دڤان باغچان دا خزمەتگوزاری یێن تایبەت تێدا هاتینە دابینكرن چ بۆ مەزنان یان بۆ زارۆكان، لڤێ دووماهیێ حكومەتا هەرێمێ و ئیدارا پارێزگەها دهۆكێ برێكا چەندین رێڤەبەریێن تایبەتمەند گرنگی دایە ئاڤاكرنا باغچەیانن و بیاڤێن كەسكاتیێ، بۆ جوانكرن و خەملاندنا باژێری ب روویەكێ جوان و شارستانی ئەڤە ژلایەكی ڤە، ژلایەكێ دی دا بكەڤنە دخزمەتا خەلكی دا و ژێرا ببنە وێستگەهێن بهێنڤەدانێ و دەم بۆراندنێ دناڤ سەقایێن پڕی جوانی و بهێنفرەهی.
بەلێ دێ بینین كۆ هێشا خەلكێ مە نەشیایە سەرەدەریەكا دورست و ساخلەم دگەل ڤان باغچە و بیاڤان دا بكەت، نەشیایە ببێتە پشكەك ژ خودانێ ڤان جهان ئەوێن بۆ خزمەتا گشتی هاتینە دورستكرن و دابینكرن، ئەڤجا بلا ئەم هەموو پاراستنا ڤان جهێن گشتی ب ئەركێ خۆ بزانین و هەر كەس لجهێ خۆ ژێ بەرپرس بزانییت.
دڤێت لایەنێن پەیوەندیدار ژی كونتڕۆلەكا باش لسەر بكەن، ب تایبەت كونترۆلا زارۆكان، دڤێت ئەو كەس یان ئەو خێزانێن قەستا ڤان باغچەیان دكەن هەر ئێك ژلایێ خۆ ڤە شیرەت و ئامۆژگاری ل زارۆكێن خۆ بكەن و ئەتەكێتێن سەیرانا و چوونا دناڤ ڤان باغچەیاندا بۆ بێژن، دا زارۆكێن وان ڤان جهان پیس و تێك نەدەن، چونكە ل دەمێن بۆری و بتایبەت پشتی ڤەكرنا باغچەیێ سەرهلدان، هندەك دیمەنێن نە جوان نە شارستانی هاتنە دیتن داكۆ د ئایندەدا ئەڤ دیمەن و بوویەرە دووبارە نەبن و كەسێن سەرەدانا ڤان جهان دكەن دلگران نەبن و ب دەمێن خۆ شادببن.