ئیران: چو هەڤدیتنان ل گەل ئەمریکا ناکەین
پەیڤدارێ وەزارەتا دەرڤە یا ئیرانێ دیار کر، هەتا نها چو هەڤدیتن د ناڤبەرا وان و ئەمریکا دا دروست نەبووینە و وەکو ئیران ئەو د رەوشا نها دا بەرهەڤ نینن ل گەل ئەمریکا چو دانوستاندنان بکەن.
ئیسماعیل بەقایی ئەو یەک ژی دیار کر، پشتی ئێرشا ئسرائیلێ یا ل سەر ئیرانێ هەتا نها ژی هەلوەستێ ئەمریکا هەر خراب بوویە، ئەمریکا گەلەک سۆز داینە ئیرانێ لێ هەتا نها ژی سۆزێن خوە بجه نەئیناینە و د رەوشەکا وەسا دا هەکە دانوستاندن ژی ل گەل ئەمریکا بهێنە کرن چو ئەنجامێن خوە نابن، ژ بەر ڤێ یەکێ ژی ئیرانێ نەڤێت د رەوشا نها دا ل گەل ئەمریکا چو دانوستاندنان بکەت.
ناڤهاتی ئەو یەک ژی دیار کر، هێشتا ژی مەترسیا ئێرشەکا نوو یا ئسرائیلێ ل سەر ئیرانێ هەیە، لێ ئیرانێ خوە بۆ هەر پێشهاتەکێ بەرهەڤ کریە و دێ ب توندی بەرسڤا هەر ئێرشەکێ ژی دەت.
