ئەمریکا دێ چاڤدێریا رێککەفتنا هەسەدێ و شامێ کەت
پشتی سەرەدانا سەرۆک کۆمارێ سووریێ بۆ ئەمریکا، بەرپرسێن سووریێ و هەسەدێ دیار دکەن دێ د بن چاڤدێریا ئەمریکا دا رێککەفتنا هەر دو ئالیان هێتە بهجئینان و هەسەدە دێ د هەموو سازیێن هێزێن ئێمناهیێ دا جه گریت و ئەو یەک ژ بۆ پاشەرۆژا سووریێ یا گرنگە.
سەرۆک کۆمارێ سووریێ ئەحمەد شەرع پشتی هەڤدیتنا ل گەل سەرۆکێ ئەمریکا دیار کر، رێککەفتنا بەری نها یا د ناڤبەرا وان و هەسەدێ دا گەلەک گرنگە و ئەمریکا ژی پشتەڤانیێ ل رێککەفتنا وان دکەت، ل گۆر رێککەفتنێ دڤێت هەموو هێزێن هەسەدێ ب هەماهەنگی ل گەل هێزێن ئێمناهیێ یێ سووریێ کار بکەن و هەسەدە ببیتە پشکەکا گرنگ ژ لەشکرێ سووریێ، ئەمریکا دێ چاڤدێریا چاوانیا بجهئینانا رێککەفتنێ کەت و بریارە د دەمەکێ نێزیک دا گەرەکا دی یا دانوستاندنان د ناڤبەرا هەسەدێ و شامێ دا دەستپێ بکەت.
ل ئالیێ دی مەزلوم عەبدی فەرمانداری گشتی یێ هێزێن سووریا دیموکرات ژی دیار کر، پشتی هەڤدیتنا ئەحمەد شەرعی یا ل گەل ترامپی ئەو ب رێیا تەلەفۆنێ ل گەل تۆم باراکێ نوونەرێ ئەمریکا بۆ کاروبارێن سووریێ ئاخڤیە و نوونەرێ ئەمریکا دیار کریە، ترامپ د هەڤدیتنێ دا بەحسێ رۆلێ گرنگ یێ هەسەدێ د شەرێ ل دژی تیرۆرێ دا کریە و هەروەسا ترامپی دیار کریە هەسەدە هێزەکا مەزن و کاریگەرە و دشێت رۆلەکا مەزن بۆ پاشەرۆژا سووریێ بگێریت.
مەزلوم عەبدی ئەو یەک ژی دیار کریە وەکو هەسەدە ئەو بەرهەڤن ببنە پشکەک ژ لەشکرێ سووریێ، لێ دێ تایبەتمەندیا هەسەدێ هێتە پاراستن و ل گۆر رێککەفتنا بەری نها دێ هەسەدە د هەموو سازیێن ئێمناهیێ دا جهێ خوە گریت و ئەو یەک دێ بیتە ئەگەر رەوشا ئالۆز یا نها ل سووریێ ب دووماهی بهێت و رەوش ئارام بیت.
ل ئالیێ دی سالح موسلیم ئێک ژ بەرپرسێن پەیەدێ ژی دیار کر، رێککەفتنا بەری نها یا د ناڤبەرا هەسەدێ و شامێ دا گەلەک گرنگە، بەری نها بەرپرسێن شامێ خواندنەکا شاش ژ بۆ وێ رێککەفتنێ دکرن، لێ دیارە پشتی سەرەدانا ئەحمەد شەرعی یا بۆ ئەمریکا رەوش هاتیە گوهۆڕین و نها بەرپرسێن شامێ ژی بەرهەڤن ل گۆر تایبەتمەندیا هەسەدێ سەرەدەریێ بکەن و گۆت: (دیارە تورکیا ژی هەلوەستێ خوە گوهۆڕیە، چونکی بەری نها تورکیا ئاستەنگی ل هەمبەر رێککەفتنا د ناڤبەرا شامێ و هەسەدێ دا دروست دکر، لێ دیارە هەلوەستێ تورکیا ژی هاتیە گوهۆڕین، پشتەڤانیا ئەمریکا یا بۆ رێککەفتنێ دێ کاریگەریا خوە یا گەلەک مەزن هەبیت، چونکی هەر کەس دزانیت بێی کوردان چو دەمەکێ رەوشا سووریێ ئارام نابیت و کورد دێ خوەدان رۆلەک مەزن بن د برێڤەبرنا سووریێ دا و دیارە تورکیا ژی ئێدی راستیێن هەی قەبوول دکەت).
