بەرهەڤیێن باش هاتینە كرن و ب هاریكارییا هەموو لایەكی گەشبینین دێ پرۆسێسەكا سەركەڤتی و ئازاد ب ڕێڤەچیت
چاڤەڕێ دهێتە كرن ل دووڤ لیستەكا بەرهەڤكری یا ژلایێ ڕێڤەبەرییا گشتی یا وەرزشی ل هەرێما كوردستانێ د ڤێ حەفتیێ دا 14 یانەیێن ل سنۆرێ پارێزگەها دهۆكێ دەست ب هەلبژارتنێن خوە یێن كارگێری بكەن بۆ كاركرنێ بۆ سالێن بهێت دا، بڕیارە سوبەهی سێ یانە دەست ب هەلبژارتنان بكەن و ئەوا دێ هەتا 23ێ ڤێ مەهێ بەردەوامبیت.
ل دۆر ڤێ یەكێ جەمال سلێمان ڕێڤەبەرێ وەرزشی ل پارێزگەها دهۆكێ بۆ رۆژنامەیا ئەڤرۆ گۆت: پشتی ب دووماهی هاتنا هەلبژارتنێن پەرلەمانێ ئیراقێ وەكو ڕێڤەبەرییا وەرزشی ب هەڤكارییا ڕێڤەبەرییا گشتی یا وەرزشی ل هەرێما كوردستانێ خشتەك بۆ پرۆسێسا هەلبژارتنێن یانەیێن وەرزشی ل سنۆرێ پارێزگەهێ هاتینە دانان، ئەڤچەندە ژی پێخەمەت ئەكتیفكرنا دەستەیێن كارگێری بۆ چار سالێن بهێت تایبەت ئەوان یانەیێن دەستەیێن وان بەروەخت هاتینە دانان، پلان و بەرنامە بۆ سەركەڤتنا پرۆسێسا هەلبژارتنان هاتینە دانان، ب دەم و ژڤان و جهێ هەلبژارتنان بۆ هاتینە دیاركرن دیسان لایەنیێن پەیوەندیدار ژی دێ بەرهەڤبن، ب هەڤكارییا هەموو لایەكێ گەشبینن دێ ئەڤ پرۆسێسە یا سەركەڤتی و ئازادیا نە بڕێڤەچیت.
هەروەسان ناڤهاتی گۆت: ل دووڤ ڕێنمایێن هەلبژارتنان بتنێ ئەوان كەسێن مافێ دەنگدانێ هەنە یێن ناڤێن وان د لیستا گشتی دا ئەوا پێشتر بۆ ڕێڤەبەریا مە هاتییە هنارتن، هەردیسان ئەو كەسێن ب دەركەڤن ژ پێنچ ئەندامان كێمتر نەبیت، هەكە كێمتر بوو دێ دوبارە هێتە كرن و نەهـ ئەنداما زێدەتر نابیت، دووڤدا دێ كارگێرییا نوو د كۆمبوونا خوە یا ئێكێ دا سەرۆك، جێكر، سكرتێر و ڕێڤەبەرێ دارایی دەستنیشانكەن ب شێوەیێ دەنگدان و دێ بۆ ب نڤێسارەكا فەرمی هێتە هنارتن.
خشتەیێ هەلبژارتنان بڤی رەنگی هاتییە بەلاڤكرن
سوبەهی دوشەمبی 17- 11- 2025 سێ یانە دێ هەلبژارتنان كەن، ل دەمژمێر 10 سپێدێ یانەیا سێمێل، ل دەمژمێر دو پشتی نیڤرۆ یانەیا ئافرەتێن دهۆكێ، ل دەمژمێر چارێ ئێڤاری یانەیا سەنحاریب.
رۆژا سێ شەمبی 18- 11- 2025ێ ، سێ یانەیێن ل سەنتەرێ دهۆكێ دێ هەلبژارتنێن خوە كەن، ل دەمژمێر 10ی سپێدێ یانەیا پۆلی تەكنیك، ل دەمژمێر دو پشتی نیڤرۆ یانەیا میدیا، ل دەمژمێر چارێ ئێڤاری یانەیا فرۆكەڤانییا دهۆك دێ هەلبژارتنێن خوە كەت.
ل رۆژا چارشەمبییا بهێت دو یانە دێ هەلبژارتنێن خوە كەن، ل دەمژمێر 10ی سپێدێ یانەیا ئامێدیێ، ل دەمژمێر سێ ئێڤاری یانەیا شێلادزێ.
ل رۆژا پێنج شەمبیێ سێ یانەیێن دی بڤی شێوەیی دێ هەلبژارتنێن خوە ئەنجامدەن، ل دەمژمێر 10ی سپێدێ یانەیا بەردەرەش، ل دەمژمێر ئیكێ نیڤرۆ یانەیا شێخان دێ هەلبژارتنان كەت، ل دەمژمێر چارێ ئێڤاری یانەیا بجێل دێ هەلبژارتنێن خوە كەت.
ل ئێكشەمبییا بهێت سێ یانەیێن یێن پارێزگەها دهۆكێ دێ هەلبژارتنێن خوە بڤی شێوەیی كەن، یانەیا تەناهی ل دەمژمێر 10ی سپێدێ، ژلایێ خوەڤە یانەیا گارە دێ ل دەمژمێر ئێكێ نیڤرۆ هەلبژارتنان كەت، ل دەمژمێر چارێ ئێڤاری یانەیا ئاكرێ دێ هەلبژارتنێن خوە ئەنجامدەت.
