ژ بۆ قووناغا ئاشتیێ تورکیا چاڤەڕێی رەوشا سووریێ یە
ڤەکۆلەرەکا ناڤدار یا تورکیا کو ب سالانە ل سەر پرسا کوردی کار دکەت دیار دکەت، هەتا رەوشا سووریێ ئێکلا نەبیت زەحمەتە ل تورکیا ژ بۆ قووناغا ئاشتیێ پێنگاڤێن بەرچاڤ بهێنە ئاڤێتن و ئەو یەک ژی بوویە جهێ دلگرانیا کوردان.
عەمبەرین زەمان رۆژنامەڤان و ڤەکۆلەرا ناڤدار یا تورکیا د داخویانیەکا دی بۆ تەلەفزیۆنا ئیلکە دیار کر، نها بزاڤەکا مەزن هەیە کو ئەمریکا سزایێن ل سەر سووریێ ب تەمامی راکەت، کار بۆ ڤێ یەکێ ژی دهێتە کرن، کوردێن سووریێ ژی داخواز ژ ئەمریکا کرینە کو راکرنا سزایان دڤێت یا مەرجدار بیت، ئانکو دڤێت دەستهەلاتا شامێ هەبوونا رێڤەبەریا خوەسەر قەبوول بکەت و وەسا سزا بهێنە راکرن و گۆت: (کورد ب ئاشکرا دبێژن پێدڤیە سیستەمێ نوو یێ سووریێ سیستەمەک نە ناڤەندی بیت، ئانکو کورد هەبوونا سیستەمەک ناڤەندی ل سووریێ قەبوول ناکەن، ئەو یەک ژی بێگومان ئاریشەیەکا گەلەک مەزنە، چونکی ئەمریکا و وەلاتێن دی یێن کاریگەریا وان ل سەر سووریێ هەیە باش دزانن هەکە کورد رازی نەبن گەلەک زەحمەتە رەوشا سووریێ ئارام بیت و دێ ئالۆزیێن هەی ژی دژوارتر لێ هێن).
ناڤهاتیێ ئەو یەک ژی دیار کریە، گەلەک ژ ئەندامێن کۆنگرێسێ ئەمریکا دیار کرینە دڤێت کورد د ناڤ شاندێ سووریێ دا جه بگرن، نابیت بێی کوردان بەحسێ پاشەرۆژا سووریێ بهێتە کرن، هەروەسا هەتا نها ژی باوەریا ئەمریکا ب ئەحمەد شەرعی ناهێت و ترسا ڤێ یەکێ یا هەی هەکە شام پێگەهێ خوە بهێز بکەت ئێرشی دورزیان و کوردان بکەت، ژ بەر ڤێ یەکێ ژی نها ئالۆزیێن گەلەک مەزن هەنە، نەرازیبوونا کوردان و دورزیان دشێت کاریگەریا خوە یا گەلەک مەزن ل سەر پاشەرۆژا سووریێ هەبیت و گۆت: (تورکیا ژ نێزیکڤە دووڤچوونا رەوشا سووریێ دکەت، تورکیا ل دژی سیستەمەک فیدرالی یە ل سووریێ، تورکیا دڤێت سیستەمێ سووریێ ببیتە سیستەمەک ناڤەندی و تێدا هندەک مافێن کەلتوری ژی بدەنە کوردان، لێ کورد ب توندی ل دژی ڤێ یەکێ نە، کورد قەبوول ناکەن د ناڤ سیستەمەک ناڤەندی دا بژین، بێگومان ئسرائیل و گەلەک وەلاتێن دی ژی ل دژی سیستەمەک ناڤەندی نە ل سووریێ).
ڤەکۆلەرا ناڤدار یا تورکیا هەروەسا دیار ژی کریە، ئەمریکا باش دزانیت هەتا داخوازیێن کوردان نەهێنە قەبوول کرن دێ یا ب زەحمەت بیت ئەو بشێن پرسێن هەی ل سووریێ چارەسەر بکەن و ل ئالیێ دی تورکیا ژی چاڤەرێی پاشەرۆژا سووریێ یە و گۆت: (رەوشا نها نیشا ددەت تورکیا چاڤەرێی روودانێن ل سووریێ یە، دیارە هەتا رەوشا سووریێ ئارام نەبیت و پرسێن هەی نەهێنە چارەسەرکرن ژ بۆ قووناغا ئاشتیێ ل تورکیا چ پێنگاڤێن بەرچاڤ ناهێنە ئاڤێتن، کورد ڤێ یەکێ باش دزانن و ئەو یەک ژی بوویە جهێ دلگرانیا سیاسەتمەدارێن کورد ل تورکیا).
