د كابینەیا نەهێ دا مۆلەتا 740 پڕۆژەیێن وەبەرهێنانێ هاتیەدان
زنار تۆڤی:
د. محەمەد شوكری، سەرۆكێ دەستەیا وەبەرهێنانێ ل حكومەتا هەرێما كوردستانێ دیار كر، ژ كارێن پێشینە یێن مەسرور بارزانی، سەرۆكوەزیرێن هەرێما كوردستانێ دروستكرنا ژێرخانا ئابۆری، رێك و پر، كارەبا 24 دەمژمێری و دروستكرنا هژمارا بانكی بوو بۆ وەلاتیان.
ناڤهاتی زێدەتر دیار كر، سیاسەتا سەرۆكوەزیران و حكومەتا هەرێما كوردستانێ گەلەك یا رۆهن بوو، كو كەرتێ تایبەت ببیتە هەڤپشكەكێ راستەقینە د ئیدارەكرنا هەرێما كوردستانێ دا، د قووناغێن بۆری و نوكە و داهاتی دا و گۆت: «د كابینەیا نەهێ یا حكومەتا هەرێمێ دا، 596 پڕۆژەیێن وەبەرهێنانێ هاتینە تەمامكرن و 740 پڕۆژەیێن نوو یێن وەبەرهێنانێ مۆلەت پێ هاتیەدان».
د. محەمەد شوكری گۆتژی: «سەرۆكوەزیران، حكومەتا هەرێمێ، دامودەزگەهێن حكومەتێ و دەستەیا وەبەرهێنانێ ڤیایە ب دروستی كەرتێ تایبەت ببیتە ئالییەكێ ب كریار د ئیدارەكرنا ئابۆرێ هەرێما كوردستانێ دا، پشكداریكرنا كەرتێ تایبەت د ڤی ئاستیدا، ب رێیا هژمارا زۆرا پڕۆژەیان ل هەموو دەڤەرێن كوردستانێ، بارێ حكومەتا هەرێما كوردستانێ د ناڤا ڤان هەموو قەیرانان دا سڤك كر، هەر چەندە بودجەیا وەبەرهێنانێ یا كێم بوو، ب تایبەتی ژی پشتی بڕینا بودجەیا هەریمێ ژ لایێ ئیراقێ ڤە، پشت ب داهاتێ ناڤخۆیی هاتبوو گرێدان، داهاتێ ناڤخۆ ژی ژ ئەگەرێ قەیرانان، داكەفتنا بهایێ نەفتێ و دو سالان ژی پەژیكا كۆرۆنایێ كێم ببوو، بەلێ سیاسەتا حكومەتێ ب ئاراستەیا ڤەدیتنا هەڤپشكەكێ دروست، كو (كەرتێ تایبەتە)، بوویە ئەگەرێ هندێ، پڕۆژەیین ئاڤەدانیێ ل هەرێما كوردستانێ بەرچاڤ بن و د هەموو كەرتان دا پێشكەفتنێن باش ب دەستڤە بهێن، سەرۆكوەزیران هەردەم بزاڤكرینە، ب بودجەكێ سنووردار، خزمەتا زێدەتر یا وەلاتیێن هەرێمێ بكەت».
