كارتێكرنا ناڤێن بیانی ل سەر زاڕۆكان
جێریە غازی كرێت
دانانا ناڤێن بیانی ل سەر زاڕۆكان، دیاردەیەكا بەربەلاڤە و ب مخابنی ڤە ئەڤ دیاردەیە ژ مێژە د ناڤ جڤاكا كوردی دا هەبوویە و هەتا نهۆ بەردەوامە و پتریا دایك و بابان ب دانانا ناڤێن بیانی پێخۆش دبن بێ كو ل سەر هندێ ئاگەهداربن كو زیانێ دگەهینە زمانێ خۆ یێ ڕەسەن، ئەڤە ژی بۆ چەندین ئەگەران دزڤرت، مینا:
1ـ بەرێخۆدانا فلمێن بیانی.
2ـ گەشتكرنا دەرڤەی وەلاتی.
3ـ تەماشەكرن و دانوستاندن ل گەل كەسانێن بیانی ب ڕێكا هێلێن ئنتەرنێتی یان ژی ب شێوەیەكی ڕاستەوخۆ.
4ـ ئاكنجیبوون یان گەشتكرنا كەسانێن بیانی بۆ دناڤ جڤاكێ كووردی دا.
5ـ پێشكەڤتنا تەكنۆڵۆجیایێ و بكارئینانا ئنتەرنێتی ب شێوەیەكی بەرفڕەه.
6ـ جهێ جوگرافی و دووراتیا د ناڤبەرا پارچەیێن كوردستانێ دا…هتد.
ئاشكرایە ئەڤ ئەگەرێن ل سەری دیاركری كارتێكرن و كاریگەریا خۆ ل سەر وەرگرتنا ناڤ و پەیڤێن بیانی هەیە و بێ گۆمان هاتنا ناڤێن بیانی و دانانا وان ل سەر زاڕۆكێ كورد نیشانا ژناڤچوونا زمانی یە، ژبەركو دبتە ئەگەر كو زمانێ كوردی پێ بێتە بەرزەكرن و نەمینت، ژبەركو ناڤێن كوردی ل سەر كەسانێن كورد ناسناما كوردان دەتە دیاركرن و دبتە خالەك بۆ زێندیكرن و مانا زمانی، ئەڤجا ئەگەر ئەڤ ناڤ بێنە لادان و ل جهێ وان ناڤێن بیانی بێنە بكارئینان، ئەڤە مە زمان و ناسناما خۆ ب دەستێن خۆ ژناڤبر و بن ئاخكر. داكو ئەم دووری ئەڤێ دیاردەیێ بن و پتر نێزیكی زمانێ كوردی بن، فەڕە ل دەمێ ژدایكبوونا زاڕۆكی دایك و باب باش هزرێن خۆ ل دۆر دانانا ناڤێ زاڕۆكی دا بكەن و پێكۆلی بكەن خۆ ژ ناڤێن بیانی دووربكەن و ل جهێ وان ناڤێن ڕەسەنێن كوردی هەلبژێرن، چنكۆ ئەو ناڤە ناسناما و نەتەوەیا ئەوی كەسی دێ دەنە دیاركرن. ئەم دكارن گرنگییا دانانا ناڤێن كوردی ل سەر زاڕۆكێ كورد بۆ ئەڤان خالان بزڤرینن:
1ـ دەولەمەندكرنا فەرهەنگا زمانێ كوردی.
2ـ دیاركرنا ناسنامەیا نەتەوەی.
3ـ پاراستنا زمانی ژ ناڤچوونێ.
4ـ تێگەهشتن ب شێوەكی ئاسان و بێ تەمومژاوی.
5ـ ڕوونیا واتایێ….هتد.
