محەمەد تاها ئێكەمێ پارێزگەهێ یە بوویە دادڤانێ ڤارێ
كوڕێ باژێرێ رۆڤیا و دادڤانێ پلە ئێك محەمەد تاها شیا باوەرنامەیا سیستەمێ VAR بۆ خولا ستێرێن ئیراقێ یا فوتبۆلێ وەربگریت پشتی بوو ماوەیێ نێزیكی دو سالا پشكداری د خولێ دا بووی ئەوا ب شێوەیێ تیۆری و پراكتیكی ل پایتەختێ ئیراقێ بەغدا هاتییە ئەنجامدان كو دبیتە ئێكەم دادڤانێ پارێزگەها دهۆكێ بگەهیتە ڤێ باوەرنامەیێ.
ل دۆر ڤێ یەكێ ناڤهاتی د دیدارەكا كورت دا بۆ رۆژنامەیا ئەڤرۆ گۆت: گەلەك كەیفخوەشم پشتی نێزیكی دو سالێن پشكداریێ د خولا ڤارێ دا كو هاتبوو بەلاڤكرن ل سەر سێ پشكا ئەوژی VAR , AVAR , Referee و بشێوەیێ تیۆری و پراكتیكی ل بەغدا بپشكدارییا 23 دادڤانێن ئیراقێ هاتبوو ڕێكخستن بتنێ ئەم 10 ب سەركەڤتین، سۆپاسیا هەر كەسەكێ پشتەڤانییا من كر و گەهشتیمە ڤێ پلێ، یا د شیان دا بیت دێ ئەركێ خوە باشترین شێوە و یاسایی كار كەم.
هەروەسان ناڤهاتی گۆت: مە ل پارێزگەها دهۆكێ دادڤانێن خودان شیان هەنە و ڕێژەیەكا گەلەگ باشن، هەرچەندە هەتا نوكە بتنێ ئەم دو دادڤانێن پارێزگەهێ د خولا ستێرێن ئیراقێ پشكدارین وەكو دادڤانێ هاریكار، ئێكێ و نیڤێ و ڤارێ ژی، هەروەسان فدراسیۆنا فوتبۆلا پارێزگەهێ و لژنەیا دادڤانان هەردەم هاریكار و پشتەڤانێن مە نە گەشبینم بۆ داهاتی دێ ڕێژەییا دادڤان زێدەتر بن، ئێك ژ مەرجێن دادڤانییا خولا ستێرێن ئیراقێ بكەی دڤێت باوەرنامەیا ڤارێ هەبیت.
ژلایەكێ دووڤە محەمەد تاهایی دیار كر پێنگاڤا وی یا ئێكێ د كارێ دادڤانیێ دا ل سالا 2014ێ بوو بدەستڤە ئینانا باوەرنامەیا سی لسەر ئاستێ ئیراقێ، ل سالا 2018ێ باوەرنامەیا پلە دو ب دەستڤە ئینا و خۆ ماندیكر و پێشئێخست شیا باوەرنامەیا پلە ئێك بدەستڤە بینت و گۆت: گەشبینم دێ پشكداریێ د قارەمانیێن دەرڤە دا كەم و ئەڤە ژی هیڤی و ئارمانجێن منن و دێ بەردەوام كار ل سەر كەم.
