دهۆك دێ قارەمانییا ئیراقێ یا كیك بۆكسینگێ مێڤان كەت
قەیس وەیس:
د داخویانیەكێ دا ئەندامێ فدراسیۆنا كیك بۆكسینگا ئیراقێ دیار كر ل ناڤەڕاستا مەها بهێت پارێزگەها دهۆكێ دێ مێڤاندارییا قارەمانییا كیك بۆكسینگێ ل سەر ئاستێ یانەیێن ئیراقێ بۆ كوڕ و كچان مێڤان كەت وەكو دووماهی چالاكییا وەرزێ 2025ێ یا فدراسیۆنێ.
زێدەتر مەحفۆز ئیبراهیم بۆ رۆژنامەیا ئەڤرۆ گۆت: ب فەرمی باژێرێ دهۆكێ هاتییە دەستنیشان كرن بۆ مێڤانداریكرنا قارەمانییا كیك بۆكسینگێ ل سەر ئاستێ لاوان و پێشكەڤتیان یێن كوڕان و دبیت ل سەر ئاستێ كچان ژی بهێتە بڕێڤە برن ئەوا دێ ل 11ێ هەتا 14ێ مەها بهێت بەردەوامبیت كو دهێتە هژمارتن دووماهی چالاكییا فدراسیۆنا مە بۆ وەرزێ 2025ێ بەر دانانا بەرنامە و پلان بۆ وەرزێ نوو یێ 2026ێ.
هەروەسان ناڤهاتی گۆت: ل دووڤ پێشبینییان دێ ڕێژەیەكا ئێكجار زوور یا یانەیێن هەریما كوردستانێ و ئیراقێ پشكداربن و دهێتە پێشبینیكرن زێدەتر هەشت یانە ژ پارێزگەها دهۆكێ بن، ئەڤە قارەمانییە باشترین دەلیڤەیە بۆ یاریزانێن مە یێن پارێزگەهێ مفایی بخوە ژێ وەربگرن ژبەركو دێ بیتە پێنگاڤەكا ڕێكخوشكەر بۆ چوونا دناڤ ڕێزێن هەلبژارتیێ ئیراقێ دا.
لدۆر بەرهەڤیێن وان ژی مەحفۆز ئیبراهیم گۆت: وەكو هەر جار پارێزگەها دهۆكێ بوویە جهێ باوەریێ ب جوانترین و باشترین ڕێكخستن بۆ هەر قارەمانییەكێ كرییە لەوما ژی بۆ ڤێ قارەمانیێ دێ بەرهەڤیێن باش و ڕێكخستنەكا نموونە بۆ هێتە دانان، پێنەڤێت سەقا و جهێ هۆلێ و ئۆتێل و رەوشا باژێرێ دهۆكێ ئێك ژ ئەگەرێن سەرەكی نە فدراسیۆنا كیك بۆكسینگا ئیراقێ دهۆكێ بەربژاربكەت.
ل دور بەرهەڤیێن تیمێن پارێزگەهێ ناڤهاتی گۆت ژی گۆت: ژلایێ یانەیێن پارێزگەهێ ئەڤ قارەمانییە باشترین دەلیڤەیە بۆ وان ئەو یاریزانێن خوە پشكداربكەن، ژبەركو دێ ل باژێرێ دهۆكێ بیت ئەو مەزاختیێن هاتنوچوونێ و ئۆتێل و هەتا بۆ هندەك یانەیان خوارن ژی نامینیت هەكە ل دەرڤەیی پارێزگەهێ با، لەوما ژی بدیتنا من دەلیڤەیەكا زێرینە بۆ هەموو یانەیان و بهیڤییا سەركەڤتنێ بۆ هەموویان دخوازین.
