پێدڤیە تورکیا سیاسەتا خوە ل هەمبەر کوردان بگوهۆڕیت
ئێک ژ دامەزرێنەرێن ئاکپارتیێ دیار دکەت، دڤێت تورکیا سیاسەتا خوە ل هەمبەر کوردان بگوهۆڕیت و دڤێت تورکیا ب جهێ دوژمناتیێ هاریکاریا کوردێن سووریێ بکەت، هەکە تورکیا ل سەر سیاسەتا خوە یا نها بەردەوام بیت دێ تووشی ئاریشەیێن مەزن بیت.
حسێن چەلیک ئێک ژ دامەزرێنەرێن ئاکپارتیێ و وەزیرێ بەرێ د کابینەیا ئەردۆغانی دا ل کۆمبوونا سەندیکا پارێزەران ل باتمانێ ئاخڤی و دیار کر، دڤێت تورکیا سیاسەتا خوە ل هەمبەر کوردان بگوهۆڕيت، نها ئەرمەنی بووینە جیرانێ تورکیا، عەرەب و فارس جیرانن، جورجی جیرانن و گەلەک خەلکێن دی جیرانێن تورکیا نە، ئەو یەک چو ئاریشەیا خوە نینە بۆچی ئەم رازی نابین کورد ژی ببنە جیرانێن تورکیا، ئەو یەک ئاریشەیەکا گەلەک مەزنە، مخابن ئەو دوژمناتیا بێ رامان یا ل هەمبەر کوردان ل تورکیا هەی دڤێت ب دووماهی بهێت، ب تایبەتی ژی دوژمناتیا ل هەمبەر کوردێن سووریێ چو مفایێن خوە بۆ تورکیا نابیت.
ناڤهاتی ئەو یەک ژی دیار کر، بەری ١٦ سالان ب رێیا من سالح موسلیم هاتە تورکیا، وی دەمی ئەو سەرۆکێ پەیەدێ بوو، سالح موسلیم ل ئەنقەرە ل گەل سەرکردەیێن حوکمەتێ کۆمبوو و ب رەنگەکێ ئاشکرا دیار کر وەکو کوردێن سووریێ و وەکو پەیەدە وان دڤێت ببنە هەڤالبەندێن تورکیا، موسلیمی ب رەنگەکێ ئاشکرا گۆت ئەو دوژمنێ تورکیا نینن و گۆت: (سالح موسلیم داخوازا هاریکاریێ ژ تورکیا کر، وی داخواز کر تورکیا هاریکاریا وان بکەت و گۆتە بەرپرسێن تورکیا نها رەوشا مە گەلەک خرابە هەکە هوون هاریکاریا مە بکەن ئەم دێ بنە هەڤپەیمانێ تورکیا، لێ مخابن هەلوەستێ بەرپرسێن تورکیا وی دەمی گەلەک خراب بوو ژ بەر ڤێ یەکێ ژی پەیوەندیێن تورکیا و پەیەدێ تێک چوون).
حسێن چەلیک ئەو یەک ژی دیار کر، نها قووناغەکا نوو ل تورکیا دەستپێکریە، ئەو یەک گەلەک باشە، تورکیا نەچارە پرسا کوردی چارەسەر بکەت، ئەڤرۆکە نەبیت دێ سوباهی تورکیا نەچار بیت ل گەل کوردان دانوستاندنان بکەت، چونکی ئێدی پرسا کوردی بوویە پرسەکا جیهانی و نها د ئاستێ جیهانێ دا گەلەک وەلات پشتەڤانیێ ل مافێن رەوا یێن کوردان دکەن، ژ بەر ڤێ یەکێ ژی دڤێت تورکیا ب کریاری ژ بۆ چارەسەرکرنا پرسا کوردی هندەک تشتان بکەت.
دامەزرێنەرێ بەرێ یێ ئاکپارتیێ ئەو یەک ژی دیار کر، دڤێت تورکیا دەست ژ سیاسەتا خوە یا شاش ل هەمبەر کوردان بەردەت، تورکیا دشێت پەیوەندیێن گەلەک باش ل گەل کوردان دروست بکەت، کورد دشێن ببنە باشترین هەڤپەیمانێ تورکیا، لێ مخابن هندەک هێز ل تورکیا جارەکا دی دخوازن ئاریشەیان دروست بکەن، دڤێت دەولەت و هەموو هێزێن سیاسی رێ نەدەن جارەکا دی قووناغا ئاشتیێ تێک بچیت، چونکی بەری نها چەندین جاران بزاڤ بۆ ئاشتیێ هاتینە کرن، لێ مخابن چو ئەنجامێن خوە نەبووینە، دڤێت ڤێجارێ هەموو ئالی هشیار بن.
