پڕۆژەیەكێ ستراتیژی یێ ئاڤێ ل بەردەڕەشێ دێ هێتە چێكرن
رەمەزان زەكەریا:
ل سنۆرێ دەڤەرداریا بەردەڕەشێ كار ل سەر پڕۆژەیەكێ مەزن و ستراتیژیێ ئاڤێ دهێتە كرن، كو ل گەل سەنتەرێ دەڤەرداریێ دێ سێ ناوچەداری و 95 گوند ژ ئاریشەیا كێمئاڤیێ رزگاربن.
ئەندازیار رێبەر نازم، رێڤەبەرێ ئاڤا بەردەڕەشێ بۆ ئەڤرۆ گۆت: «پڕۆژەیێ ئاڤا بەردەڕەشێ ل زێیێ مەزن ل سنۆرێ ناوچەداریا دارەتوو دێ هێتە چێكرن و ئاڤێ بۆ سەنتەرێ دەڤەرداریا بەردەڕەشێ و هەرسێ ناوچەداریێن وێ ل گەل 95 گوندێن سنۆرێ دەڤەرداریا بەردەڕەشێ ڤەگوهێزیت».
گۆتژی: «ب گوژمێ 428 ملیار دیناران پڕۆژە ل سەر بودجا پارێزگەها دهۆكێ دهێتە بجهئینان و نوكە ل قووناغا دیزانێ دایە و كار ل سەر دهێتە كرن، ل ڤان نێزیكان بەرێ بنیاتی دێ بۆ هێتە دانان، پڕۆژە دێ ئاریشەیا ئاڤێ ل سنۆرێ دەڤەرداریا بەردەڕەشێ بۆ دەمێ 25 سالێن بهێن چارەسەر كەت، ب تایبەت ل وەرزێ هاڤینێ».
