بۆ چارەسەركرنا كێشەیا ئاڤا گران 15 پڕۆژە دێ هێنە بجهئینان
دهۆك، دلۆڤان ئاكرەیی:
حوكمەتا هەرێما كوردستانێ، كار ل سەر وێ چەندێ دكەت، كێشەیا ئاڤڕێژان و ئاڤا گران چارەسەر بكەت، د هەمان دەم دا مفا ژ وێ ئاڤێ وەربگریت بۆ كەسكاتیا باژێڕان و بۆ ڤێ مەرەمێ ژی پلانەكا ستراتیژی بۆ سەرانسەری هەرێما كوردستانێ ئامادەكریە.
ئاری ئەحمەد، ڕێڤەبەرێ گشتیێ ئاڤ و ئاڤڕێژان ل هەرێما كوردستان بۆ رۆژنامەیا ئەڤرۆ گۆت: «پلانا ستراتیژی یا حوكمەتا هەرێما كوردستانی بۆ چارەسەركرنا كێشەیا ئاڤا گران، ژ بجهئینانا 15 پڕۆژەیێن ستراتیژی یێن گرنگ پێك دهێت، هندەك ژ وان پڕۆژەیان خواندن بۆ هاتیە كرن و د پاشەرۆژەكا نێزیك دێ كەڤنە د وارێ بجهینانێ دا، هندەك ژی ل پاشەرۆژێ خواندن بۆ دێ هێتە كرن و ئەڤ پڕۆژە، كو ب چەندین قووناغان و ل گورەی شیانێن حوكمەتا هەرێما كوردستانێ دێ هێنە بجهینان، بۆ چارەسەركرنا كێشەیا ئاڤا گران».
ناڤهاتی گۆتژی: «نوكە حكومەتا هەرێما كوردستانێ كار ل سەر پلانەكا ستراتیژی دكەت، كو پلان ژ بجهئینانا 15 پڕۆژەیان ل هەمی پارێزگەهێن هەرێما كوردستانێ پێك دهێت».
هندەك ژ وان پڕۆژەیان ل سنۆرێ پارێزگەها دهۆكێ دێ هێنە بجهئینان، كۆ ژ وەستگەها پاقژكرنا ئاڤڕێژێ ل دهۆكێ، وەستگەها پاقژكرنا ئاڤڕێژێ ل شاریا، وەستگەها پاقژكرنا ئاڤڕێژێ ل سێمێلێ و وەستگەها پاقژكرنا ئاڤڕێژێ ل زاخۆ پێك دهێن.
