پارێزگارێ دهۆكێ و بالیۆزێ ئیتالیا دوپاتـی ل خورتكرنا هەموو جۆرێن پەیوەندیان كـر
د. عەلی تەتەر، پارێزگارێ دهۆكێ دوهی 17/11/2025 ل كۆچكا مێهڤانداریان پێشوازی ل نیكۆلۆ فۆنتانا، بالیۆزێ وەلاتێ ئیتالیا ل ئیراقێ و توماس سانسون، قونسلێ گشتی یێ ئیتالیا ل هەرێما كوردستانێ و شاندێ د گەل دا كر.
د هەڤدیتنەكێ دا بەحسێ رەوشا دەڤەرێ و ئاوارە و پەنابەران و بزاڤا بازرگانی و ئابووری و رەشا كەرتێن چاندنێ و گەشتیاری ل پارێزگەهێ ب گشتی هاتە كرن.
د تەوەرەكێ دی دا بەحسێ پرۆسەیا هەلبژارتنێن ئیراقێ و رێژەیا پشكداریا وەلاتیان د دەنگدانێ دا و گرنگیا ئەنجامدانا «كۆنفرانسێ مێپس» ل زانكۆیا ئەمریكی ل سێمێلێ ل پارێزگەها دهۆكێ و چەند بابەتێن دی هاتە كرن.
هەردو لایان دوپاتی ل سەر خورتكرنا هەموو جۆرێن پەیوەندیان كر، نەخاسمە هاندانا وەبەرهێنەر و كۆمپانیێن ئیتالی بهێتە كرن، كو كار و پڕۆژەیێن وەبەرهێنانێ د بیاڤێن جودا جودا دا ل سنۆرێ پارێزگەها دهۆكێ ئەنجام بدەن.
