لەرزینا دەستان

شیان مەهدی کانیسارکی

هێژ د کاملانا تەمەنیدا
دەستان حەزا گرتنا
چ گولان نەما..

دلان دەرگەهـ نەهێلان ل تاق،
چاڤ ژی بوونە هەڤکویفێن
مژویلانکێن نەلڤ و شل
نامه هێلان گرتی..

پێ ژی نەشیان وی کەلەخێ
پیر هەلگرن..
گۆتنا «ب تنێ ئاخ بوهایێ مە دزانیت»
د گوهێن کەڕدا دەنگڤەددا..

ئەز بۆ مە پیرەکالۆتەکێ سهـ سالی،
ل بەر ڤی دەرگەهێ ل تاق..
ل هیڤیا فریشتەیێ مرنێ
ب دەستەکێ ڤالا و ئێکێ تژی شرینی،
و دلەکێ پڕی وەسیەت،
ل هیڤیا خۆلەکا پێشوازیێ.

دبیت مرن، من و تە نێزیکی ئێک بکەت!
مینا دو جێمکان،
مینا مژویلانکان،
هەردەم ل هەمبەری ئێک بین یان
دا د هەمبێزا ئێک دا غەور ببین.. و
هشیار نەبین ڤە.

بەری ئەز بمرم، ئەز یێ ل بیرا من..
و تو ژی یێ ل سەر گۆڕێ من
ل من دگەڕێ.
هێژ ئەز ژی ل کێلیا تە، نە هەلنگفتمە!

کۆمێنتا تە