هەڤسەنگی د ناڤبەرا پێگەهـ و مرۆڤاتیێ دا
چنار ئەحمەد
برێڤەبرن نە بتنێ روینشتنە لسەر كوڕسیكا بریارێ و هەبوونا پێگەهەكێ بلندە د رێكخراوێ یان ژی د جڤاكی دا بەلكو پێك دهێت ژ هەڤسەنگیەكا هەستیار و هوشیار د ناڤبەرا قەبارێ دەستهەلاتا فەرمی و بنەمایێن رەوشتی و مرۆڤایەتی و كلیلا سەركەفتنا بەردەوام پویتەدانە ب هەڤسەنگیا ڤان هەردو لایەنان.
د جیهانا پەیداكرنا كار و دەستكەفتان دا گەلەك جاران پەیوەندیێن مرۆڤایەتی دكەڤنە بن سیبەرا پێگەه و دەستهەلاتێ دا و دەستەواژێ (ئەز) ل وێرێ دەست پی دكەت كو مرۆڤێ خودان دەستهەلات هزردكەت هەبوون و ئارمانجێن دەوروبەران بتنێ وەك بەرسڤەك بۆ ئارمانج و بڕیارێن وی نە، هینگی دێ هێز و پاشەرۆژا گەلەك مرۆڤان بیتە قوربانیا پەیكەرێ ڤەشارتی یێ خۆپەرستیێ.
دەستهەلاتا ئێكێ د رێكخراوێ دا خالا دەسپێكێ و بنەرەتی یا سەركەفتن یان ژی شكەستنا هەر دەزگەهەكی یە، هەردەمێ رێڤەبەری پێگەهێ خۆ كرە پیڤەرێ بریارێن دروست و خەلەت وی دەمی هێدی هێدی دێ گیانێ پێكڤە كاركردن و نەرماتیا برێڤەبرنی كوژیت و كەسانێن زیرەك شارەزا ل دەروبەرێن خۆ ژدەستدەت وب هێمنی بیتە ئەگەرێ نەمانا باوەریا وان ب وێ دەستهەلاتێ.
برێڤەبرن د راستی دا ئەوە كو مرۆڤ بزاڤێن باشكرنا رۆژانێن هەڤالێن خۆ بكەت و رازیبوونا وان بدەستڤە بینیت، نەك بتنێ وێنەیێ خۆ د چاڤێن وان دا پاقژ بكەت و هێزا كوڕسیكا خۆ لسەر وان بسەپینیت ب هێجەتا یاسا و رێنمایان، دهێتە گۆتن برێڤەبرن د ناڤبەرا پێگەه و مرۆڤایەتیێ دا رێڤەچوونەكە لسەر پرەكا تەنگ د ناڤبەرا ماددی و مەعنەویاتێ دا، ئەڤجا بلا لایەنێ مادی كارتێكرنێ لسەر وژدان و بریارێن مە نەكەت.
ل دوماهیێ ژی گرنگە بێژین رێڤەبەرێ مەزن ئەو كەسە كو پێگەهێ خۆ وەك ئاسمانەكی بكاردئینیت و رۆژا مرۆڤایەتیێ د ناڤدا بگەشینیت.
