پێكئینانا حوكمەتا هەرێمێ گیرۆتر نەكەن
غیاس خـالد زێباری
سالەك زێدەتر ب سەر هەلبژارتنێن پەرلەمانێ كوردستانێ دەرباز بووینە، پشتی چەندین كۆمبوونێن د ناڤبەرا پارتی دیموكراتی كوردستان وەكی هێزا سەركەفتیا ئێكێ و ئێكەتیا نشتیمانیا كوردستانێ وەكی هێزا دوویێ، هێشتا چ ئاماژەیێن رۆن یێن پێك ئینانا حوكمەتا هەرێما كوردستانێ و دەستبكاربوونا پەرلەمانێ كوردستانێ و دەستنیشانكرنا سەرۆكێ هەرێمێ دیار نینە، ئەو هەمی كۆمبوونێن هاتینە كرن دبێ ئەنجام بوونە و وەكی دهێتە دیتن ئێكەتیا نشتیمانیا كوردستانێ ئەگەرێ سەرەكیێ ڤێ گیرۆبوونێ یە و د هەوا بانگەشەیا هەلبژارتنێن جڤاتا نوونەرێن ئیراقێ، ئێكەتیا نشتیمانی ئەڤ گیرۆبوونە ب دەستكەفت زانییە..!.
هەرچەندە ل مەهێن بۆری پارتی دەسپێشخەریێن باش هەبوونە لێ لایەنێ بەرامبەر ب مەبەست نەهاتیە پێش ، ئەڤێ گیرۆبوونا كارابوونا پەرلەمانێ كوردستانێ زیانەكا مەزن بۆ هەرێما كوردستانێ هەیە و ب گیرۆبوونا زێدەتر زیانێن وێ دێ مەزنتر بن و دوور نینە شەرعیەتا هەرێما كوردستانێ لسەر ئاستێ نیڤدەولتی زۆر لاوان ببیت، لەوما پێدڤی یە پارتی دیموكراتی كوردستان وەكی هێزا سەركەفتیا ئێكێ و هێزا راگرتن و پاراستنا قەوارێ هەرێما كوردستانێ گاڤێن ب لەز بۆ كاراكرنا پەرلەمانێ كوردستانێ و پێكئینانا كابینا دەهێ یا حوكمەتێ بهاڤێژیت و دەستكەفتێن گەلێ كورد نەكەتە قەوربانی بەرژەوەندێن ئالیێن دیتر یێن سیاسی و داوی ئاگاداری بدەتە ئێكەتیا نشتیمانی و ب راشكاری بەرسڤێ لێ وەربگریت، ئەرێ دێ پشكداری كابینا داهاتی بیت یان نە ..؟ نابیت پارتی زێدەتر خەلكێ كوردستانێ د چاڤەرێبوونێ دا بهێلیت و ئەگەر ئێكەتیێ چ بەرسڤێن ئەرێنی نەبن، پێدڤیە پارتی ل دووڤ ئەلتەرناتیڤەكی بگەڕێت و لایەنەكێ دیتر یێ سیاسی رازی بكەت بۆ كاراكرنا پەرلەمانی و پێكئینانا كابینا دەهێ. چونكی گیرۆبوون زێدەتر د بەرژەوەندیا هەرێما كوردستانێدا نیە و ئەز باوەرم ئیراق ژی لسەر ڤێ گیرۆبوونێ دێ هێتە دەنگ و ئەگەر ئیراق د رەوشا هەلبژارتنێن جڤاتا نوونەران دا نەبا دبیت د رێكا دادگەها فیدرال ئەنجامێن پەرلەمانێ كوردستانێ هەلوەشاندبان و ڤالاتیەكا قانوونی و دەستووری درۆست ببا و ئەرەبێن شۆفینی یێن ئیراقێ دا هەولا هەلوەشاندنا قەوارێ هەرێما كوردستانێ دەت. بەردەوامیا ڤێ رەوشا كوردستانێ پێگەهێ وێ لسەر ئاستێ ئیراقێ دێ لاواز كەت و دوور نیە قەیران و ئاستەنگێن زێتەر ل داهاتی بۆ دروست بكەت. فەرە ئێكەتیا نشتیمانی ژی داخوازیێن زێدەتر ل بەركەفتیێن خوە یێن هەلبژارتنا بكەت و ژبۆ بەرژەوەندیا گشتی یا كوردستانێ لدویڤ ئەنجامێن هەلبژارتنا هەر لایەنەك ب پشكا خوە ل دەستهەلاتێ رازی ببیت.
