سالا بهێت مووچەیێ مامۆستایان دێ هێتە زێدەكرن
سەرۆكێ ئێكەتیا مامۆستایێن كوردستانێ ئاشكراكر، پێدڤیە مامۆستایێن هەرێمێ ژی ژ زێدەكرنا مووچەیێ مامۆستایان مفاداربن و دبێژیت: سالا بهێت زێدەهیا مووچەیێ مامۆستایان ل ئیراقێ دێ كەڤیتە د بیاڤێ بجهئینانێ دا.
ئەحمەد گەرمیانی، سەرۆكێ ئێكەتیا مامۆستایێن كوردستانێ بۆ رۆژناما ئەڤرۆ دیاركر، هێشتا بڕیارا زێدەكرنا دەرمالێ مامۆستایان ل ئیراقێ نەكەفتیە د بیاڤێ بجهئینانێ دا و گۆت: «بڕیارە ل گەل پەسەندكرنا پڕۆژەقانوونا بودجەیا گشتی یا ئیراقێ بۆ سالا بهێت، بڕیارا زێدەكرنا مووچەیێ مامۆستایان بكەڤیتە د بیاڤێ بجهئینانێ دا و 150 هزار دینار ل سەر مووچەیێ وان دێ هێنە زێدەكرن، پێدڤیە زێدەكرنا مووچەیێ مامۆستایان هەرێما كوردستانێ ژی ڤەگریت، چونكی د دەمێ نوكە دا هەموو لێبڕین و مەزاختیێن مووچەی ژ لایێ بەغداڤە دهێنە ئەنجامدان، لەوڕا هەر زێدەبوونەك هەبیت، دڤێت مامۆستایێن هەرێما كوردستانێ ژی ژێ مفادارببن».
سەرۆكێ ئێكەتیا مامۆستایێن كوردستانێ گۆتژی: «ئەركێ پەرلەمانتارێن كورد و نوونەرێن هەرێما كوردستانێ یە بەڕەڤانیێ ژ مافێن مامۆستایێن هەرێما كوردستانێ بكەن، چونكی هەتا نوكە دیار نینە سەدێ سەد بەغدا دێ پارەی بۆ مامۆستایێن هەرێمێ زێدەكەت یان ژی نە، هەرچەندە ژ لایێ قانوونی ڤە مافێ مامۆستایێن هەرێما كوردستانێ یە».
