پێشمەرگە
ئاشتی یۆنس
د سەنگەرەکێ شەرێ دژی داعشێ دا، پێشمەرگەیەك دهێتە گرتن، ل دەما ئێخسیرکرنێ دا، بتنێ خەما مالباتا خۆ و وەلاتێ خۆ دخوار، ئەڤە بۆ وی دەردەکێ گەلەك گرانە، دگەل هندێ هیڤی و خەونا وی یا هەرە مەزن ئەوە ئازاد ببیت، بۆ هندێ داکو دوبارە بڤەگەڕیتە سەنگەرێن شەری. پشتی بۆرینا دەمەك درێژ و چەندین هەولدانێن بێ راوستیان ژئالیێ مالباتا وی و ژ جهێن پەیوەندیدار و شولەژێڤە یێن بجهێ کارێ وێڤە گرێدایی، ب شێوەیەکێ چاڤەرێنەکری دهێتە ئازادکرن، دەمێ گەهشتیە مالێ بدیتنا مالباتا خۆە گەلەك دل شاد دبیت. هەموویان پێکڤە هەڤدو ماچ و هەمبێز کرن، و گەلەك کرنە گری و ڕۆندکێن خۆشیێ و کەیفێ باراندن و بەردانە تلیلیان، هەڤژینا وی بۆ خودێ چوو سۆجدا سۆپاسیێ و نەفرەت ل داعشێ کرن و گۆت: ڕوو ڕەشی و سەرشۆڕی و شەرمزاری و شکەستن هەر بەهرا وان بیت. پشتی هینگێ ئێکسەر سەرەك کرنە خێر بۆ وی. و پیرۆزباهی لێکرن، گۆتە وان:» هوین نزانن ئەز چەندێ ژهەوە خەریب بوویم، ما ئەڤە هەستێ خەریبیێ چەندێ تالە و نەخۆشە، و ژسەری هەتا بنی چیڕۆکا خۆ بۆ وان ڤەگێڕا. و دوپاتی کر کو قەد ژمرنێ نە ترسیایە و پەشیمان نە بوویە بۆ وێ قوربانیا لسەر خاترا کوردایەتیێ و کوردستانێ دایی.
ل ڕۆژا پاشتر، بێ دودلی بڕیارێ ددەت ڤەگەڕیتە سەنگەرێن جەنگی؛ داکو بەرگیریێ ژئاخا وەلاتێ خۆ بکەت، ژبەرکو ب باوەریا وی نها قۆناغەکا گەلەك هەستیارە و دەم وەسا دخوازیت، ئەڤرۆ خاکا وی پتر ژ هەر دەمەك دی پێدڤی ب هاریکاری و پشتەڤانیێ هەیە، پاراستنا وێ ئەرکەکێ نشتیمانیە، هەستکر كو جهێ وی یێ ڤالایە و دڤێت بچیت وێ ڤالاهیێ پر بکەت.
زێدەتر درێژی دا پەیڤینا خۆ، و مینا هەلبەستڤانەکی ب هەستەکێ جوان دەربڕینا هەستێن خۆ دکر و ئینا زمان و گۆت: کوردستانا من، واتە دایکا هەموو تشتێ من. بێ سنوور حەز ژێ دکەم، ئەو بۆ من بەری هەر تشتی یە و ژهەر تشتی پیرۆزترە، ژبەرکو ئەو پەیڤەیە یا هەردەم لسەر زمانێ منە، و ڤینا وێ هەردەم یا دناڤ دلێ مندا چاندیە، و ئەو هزرەیە یا هەردەم دناخێ مندا زیندیە. مینا تەمەت ڕەحما مەزن یا دایکەکێ بۆ جەگەرا خۆ، ئەز هەردەم بۆ وێ ب دلسۆز و وەفادارم، گۆری وێ بم، و نە مینم بۆ ناڤێ وێ یێ هندە پیرۆز و شرین و گرانبها، و بارێ وێ گەلەك گران و مێژوویا وێ یا پڕی تراژیدی وستەم و بندەستی، بەلێ هێشتا یا کێمە دڤێت ئەم پتر بۆ وێ بجەنگین هەتا بشێن گەلەك باشتر چارەنڤیسێ خۆ ب دەستڤە بینین، و نەخشەیێ خۆ گەلەك باشتر بخەملینین، و خەونا خۆ بکەینە راستی.
پاشان ئالایێ کوردستانێ ژجانتا خۆ ئینا دەرێ و ماچیکر، و دانا لسەر ملێن خۆ، هەر دو تبلێن خۆە بهێمایێ سەرکەفتنێ بلندکرن.
زارۆکێن وی گۆتنێ: « هوین ب گیانێ خۆ و بقەهرەمانیا خۆ بەرگیریێ ژمە دکەن، و ئەڤ ئازادیا نها ئەم تێدا دژین، هەموو بەرهەمێ ماندیبوون و قوربانیدانا هەوەیە. بەلێ سۆزێ ددەین ئەم ژی پێکڤە ب پێنوس و زانستێ خۆە خزمەتا گەل و وەلاتێ خۆە بکەین، و چاڤەرێ وێ ڕۆژێنە هوین، مزگینیا سەرکەفتنێ ڕابگەهینن.
ل داویێ خاترا خۆە خۆاست و داخوازا لێبۆرینێ ژوان کر، و دا ڕێ، ل دۆر خۆ زڤری و گۆتە هەڤژینا خۆ: ژبیر نەکە مە ژلاڤایێن خۆە بێ بەهر نەکە، هەڤژینا وی بەرسڤا وی دا و گۆتێ: وەغەرا تە یا خێرێ بیت، خۆدێ هەوە هەموو پێشمەرگەیان بپارێزێت.. ومرن بۆ دوژمن و نە حەزێن کوردستانێ بیت.
