ڤۆلی بۆلا سەنحاریب چوو كوێتێ و چاڤ ل ناسناڤێ رۆژئاڤایە
بڕیارە ئەڤرۆ شاندێ تیما ڤۆلی بۆلا یانەیا سەنحاریب ل فرۆكخانەیا هەولێر یا نێڤدەولەتی بەر ب وەلاتێ كوێتێ بچیت ژبۆ پشكداریێ د قارەمانییا رۆژئاڤا ئاسیا ل سەر ئاستێ كچان ئەوا بڕیارە هەڤڕكیێن وێ سێ هەتا 14 كانوونا ئێكێ یا بهێت وەلاتێ كوێتێ مێڤاندارییا وێ بكەت.
هەژی گۆتێ یە پشكدارییا یانەیا سەنحاریب هات پشتی ل وەرزێ بوری یێ خولا نایاب یا ڤۆلی بۆلا ئیراقێ ناسناڤ ب دەستڤە ئینابوو دەرئەنجامێ د یارییا دووماهیێ دا ب سەركەفتی ل سەر یانەیا ئەكاد عنكاوە ب سێی گێمان بەرامبەر گێمەكێ و پلێتا كۆپا رۆژئاڤا ئاسیا ژی ب دەستڤە ئینا.
لدۆر ڤێ یەكێ و دووماهی بەرهەڤیێن تیما سەنجاریب داود رەبەن سەرۆكێ یانەیێ و سەرۆك شاند گۆت: ل دەستپێكێ من دڤێت سۆپاسییا د. عەلی تەتەر پارێزگارێ دهۆكێ بكەم پشتی ڕازیبوون و پشتەڤانییا خوە ل یانەیا مە كری بۆ پشكداریێ د قارەمانیێ دا، پێخوەشحالین وەكو یانەیەكا پارێزگەهێ و كوردستانی نوونەر بین د ڤێ قارەمانیێ دا، پێنەڤێت پشكدارییا مە نە بتنێ بۆ هژمارەیە بەلكو مە پلان و بەرنامە داناینە هەڤڕكیێ ل سەر ڕێزێن پێشیێ بكەین و بۆ هەر یارییەكێ پلانێن سەركەڤتنێ هاتینە دانان.
هەروەسان گۆت: ب سەرپەرشتییا د. هەكار بەرقی ڕاهێنەرێ خودان شیان مە باوەریەكا مەزن ب یاریزانێن خوە هەنە و ژبۆ بهێزكرنا ڕێزێن تیما خوە ژی سێ یاریزانێن نوو و پیشەكار ئیناینە دناڤ ڕێزێن تیمێ دا پێخەمەت باشترین شێوە بەرهەڤبین و ئەو یاریزان ژی هەر ئێك ژ میدیا بورهانی، سپێدە ئیسماعیل و سارا پاتا كو دبنە خالێن هێزێ بۆ تیمێ
سەرۆكی یانەیا سەنحاریب پەسنا پشتەڤانییا پارێزگارێ دهۆكێ و ڕێكخستنا پارتی كر و گۆت: پێنەڤێت هەكە پشتەڤانییا د. عەلی تەتەر و بەرێز سەربەست لەزگین بەرپرسێ ڕێكخستنا پارتی ل پارێزگەهێ نەبا ئەم نەشیان ب هیچ شێوەیەكی پشكداربین ژبەركو مەزاختیەكێ مەزن بۆ دڤیا و مە شیان نەبووینە، سۆپاسییا هەردو لایەنان دكەین و سۆزێ ددەین ب هەموو شیانێن خوە ب ئاست و ئەنجامێن مەزن وەكو یانەیەكا پارێزگەهێ و كوردستانێ خۆ دیار بكەین.
بۆ زانین تیما ڤۆلی بۆلا یانەیا سەنحاریب د كۆما سێیێ دا هاتیە و پێكهاتینە ژ یانەیێن نەسر یا ئوردنی، قودس یا فلەستینی و فەیحا یاسعودی، یانەیێن پشكدار ژ وەلاتێن ئوردن، فلەستین، یەمەن، لوبنان، سعودیە، قەتەر، ئیمارات و ئیراق، ئەركێ مە ب سانەهی نابیت لێ ئەم بۆ هەر یارییەكێ بتنێ سەركەڤتن ئارمانجا مەیە.
