ئسرائیل بەرهەڤیان بۆ ئۆپەراسیۆنێن نوو دکەت
بەرپرسەکێ ئسرائیلێ بۆ کەنالێ ١٣ یێ ئسرائیلێ دیار کریە، ل سووریێ مەترسی ل سەر ئسرائیلێ هەنە و بەری چەند رۆژان ژی چەند سەربازێن ئسرائیلێ ل باشورێ سووریێ بریندار بووینە، ئسرائیلێ دڤێت مەترسیێن هەی نەهێلیت و ژ بەر ڤێ یەکێ ژی ئسرائیلێ بەرهەڤی بۆ ئۆپەراسیۆنێن نوو ل سووریێ دکەت، دبیت وەکو لوبنانێ وەسا ل سووریێ ژی ب رێیا ئەسمانی ئێرشی هندەک دەڤەران بهێتە کرن ئەو جهێن کو ببنە مەترسی ل سەر ئسرائیلێ.
ل ئالیێ دی وەزارەتا دەرڤە یا سووریێ ژی دوهی راگەهاند، ئسرائیلێ دڤێت رەوشا سووریێ ئالۆزتر لێ بکەت و بزاڤێن نها یێن ئسرائیلێ ل سووریێ ب چو رەنگەکێ ناهێنە قەبوول کرن و دڤێت رێگری ل ئسرائیلێ بهێتە کرن، بزاڤێن نها یێن ئسرائیلێ دێ بنە ئەگەرێ رەوشەکا گەلەک خراب هەم ل سووریێ و هەم ژی ل رۆژهەلاتا ناڤین، چونکی ئەو دەڤەرێن ئسرائیلێ بۆمبەباران کری جهێ خەلکێ سڤیلن و چو دەمەکێ ژی مەترسی نینن بۆ ئسرائیلێ.
