سێگۆشەیەكا بازنەیی
سالح دۆسكی
كەدا سالان
هندی ماندی بوو، دەمێ دەرگەهـ ڤەكری و ژۆر كەتی، ئێكسەر قەستا نڤینا خۆ كر و كەتە خەوەكا كوور، ژبیر كربوو كو دەرگەهــ كلیلا دای بوو! پا چەوا ئێكسەر هاتە ژۆر..؟ كێ ژبەری وی ڤەكربوو.. لنیڤا شەڤێ، پشتی ب “موعجیزە” ژ دربێن كێرا وی كوژەكی قورتال بووی، ل سەر كەلەخێ وی، تێلەفۆنا پۆلیسا دكر و دبەرا گۆت: تو دێ خوهدانا من یا سالان دزی… هەی …
وندابوون
سێزدە سالان ل وەلاتێ غەریبیێ ژیا، دەمێ بریار دایی ب ئێكجاری قەستا وەلاتێ خۆ بكەت، زارۆكێ وی ئەوێ بەرەف چاردە سالیێ ڤە دچیت قایل نەبوو.. دناڤبەرا دو هێلێن سار و گەرم دا هەلاویستی ما.
بازنە
د مالدا، شەڕێ رۆژانە، ل دەرڤە هەڤركی و بەریكانە، ل كاری فشار و دمارگرتن.. پاشی ل خۆ زڤڕی و تەماشەی ئەسمانان كر و پستپستەك ب ئەنیگرێ ڤە كر.. هیشتا كەس نزانیت كا وی چ دگۆت.
