زاخۆ و ئاكرێ دێ ژ دەرڤەی یاریگەهێن خوە بزاڤێن سەركەڤتنێ كەن
چاڤەڕێ دهێتە كرن ئەڤرۆ دەست ب هەڤڕكیێن گەڕا شەشێ ژ قووناغا ئێكێ یا خولا كوردستانێ بۆ یانەیێن پلا نایاب یا فوتبۆلێ ب ئەنجامدانا سێ یارییان و سوبەهی ژی سێ یاریێن دی ژی هێنە كرن، هەردو یانەیێن پارێزگەهێ زاخۆ و ئاكرێ دێ ل هەولێرا پایتەخت و باژێرێ سلێمانیێ یاریێن خوە ئەنجامدەن ئەوا بڕیارە هەموو یاری ل دەمژمێر دو یێ پشتی نیڤرۆ بهێنە كرن.
زاخۆ مێڤانا هندرینە
ل هەولێرا پایتەخت كوڕێن خابووری دێ بنە مێڤانێن یانەیا هندرین د یارییەكا بهێز دا، خودانێن ئەردی و جەماوەری باشترین ئاست و ئەنجامدایە ئەوا سەرێ لیستێ دهێت ب كۆمكرنا 11 خالان ژ سێ سەركەڤتن و دو وەكهەڤی بێ هیچ خوسارەتیەك، دبەرانبەر دا یانەیا زاخۆ بتنێ حەفت خال كۆمكرینە ل رێزا حەفتێ دهێت ژ دو سەركەڤتن و وەكهەڤییەكێ و دو خوسارەتی هەنە، ئەركێ كوڕێن خابووری ب سانەهی نابیت.
ئاكرێ ل سلێمانیێ یە
ژلایێ خوەڤە تیما یانەیا ئاكرێ دێ ل یاریگەها زانكۆ باژێرێ سلێمانیێ بیتە مێڤانا یانەیا سیرۆانی نوو د یارییەكا دی یا هەڤڕكی بۆ نوونەرا پارێزگەهێ ئەوا حەفت خال كۆمكرین رێزا پێنجێ دهێت ژ بتنێ سەركەڤتنەك و چار وەكهەڤی و چو خوسارەتی نەداینە، د بەرانبەر دا یانەیا ئەرد و جەماوەر هەمان خال هەنە ژ دو سەركەڤتن و وەكهەڤیەكێ و دو خوسارەتیان رێزا چارێ دهێت، ئەڤ یارییە دێ یا هەڤڕكیێ بیت بۆ ڕێزبەندیەكا باشتر.
ژ یاریێن دی یێن ڤێ گەڕێ
ئەڤرۆ، شێروانە- دەربەندیخان، چوارقۆرنە- ڕانیە، سوبەهی ئەینی، ڕزگاری- پیشەسازی، پێشمەرگەیا هەولێر- قەلادز.
ڕێزبەندییا خولێ بەری دەستپێكرنا گەڕا شەشێ
1- هندرین 11 خال.
2- چوارقۆرنە هەشت خال.
3- ڕانیە هەشت خال.
4- سیروانی نوو حەفت خال.
5- ئاكرێ حەفت خال.
6- ڕزگاری حەفت خال.
7- زاخۆ حەفت خال.
8- پێشمەرگەیا هەولێر حەفت خال.
9- قەلادزێ پێنج خال.
10- شێروانە چار خال.
11- پیشەسازی چار خال.
12- دەربەندیخان دو خال.
باشترینێن گەڕا ئێكێ هەتا پێنجێ
ڕاهێنەر دلشاد مەعرۆف- هندرین، گۆلپارێز سەركار سەردار- ڕزگاری، هێلا بەرەڤانیێ، كاردۆست عەلی- ڕانیە، سەلام محەمەد-ڕزگاری، سەفا حوسامەدین- هندرین، هەنگاو محەمەد- ئاكرێ، هێلا ناڤین، یوسف ئەیۆب-زاخۆ، هێمن نازم-هندرین، سوهەیب تاها-سیروانی نوو، هێلا هێرشبەریێ سەنگەر محەمەد- چوارقۆرنە، ئەیمەن رەعەد-ڕانیە، موئەیەد موستەفا- شێروانە.
