رۆلێ سەرۆک بارزانی ژ بۆ ئاشتیێ گەلەک گرنگە
پەیڤدارێ ئاکپارتیێ دیار کر، قووناغا ئاشتیێ یا تورکیا ب رەنگەکێ باش بەردەوام دکەت و سەبارەت ب روودانێن ل جزیرێ ژی دیارە تێگەهشتنەکا شاش دروست بوویە، چونکی هەر کەس دزانیت رۆلێ سەرۆک بارزانی بۆ ئاشتیێ ل تورکیا گەلەک گرنگە.
عومەر چەلیک پەیڤدارێ ئاکپارتیێ د داخویانیەکێ دا بۆ کەنالێ خەبەر تورک دیار کر، چەند رۆژن ل تورکیا بەحسێ دیمەنێن ل جزیرێ دهێنە کرن، هندەک رەخنە ژی هەبوون، ئەو رەخنە ژ بۆ هندەک سازیان بوون نە ژ بۆ سەرۆک بارزانی، چونکی دەمێ سەرۆک بارزانی سەرۆکێ هەرێما کوردستانێ بوو وی دەمی ژی پەیوەندیێن تورکیا و هەرێما کوردستانێ گەلەک باش بوون و نها ژی پەیوەندیێن تورکیا و هەرێما کوردستانێ گەلەک باشن و گۆت: (سەرۆک بارزانی رۆلەک مەزن ژ بۆ پێشڤەبرنا قووناغا ئاشتیێ ل تورکیا دگێریت و هەر کەس دزانیت بەری نها ژی سەرۆک بارزانی گەلەک بزاڤ کرینە دا شەڕێ ل تورکیا ب دووماهی بهێت، ئەو یەک گەلەک گرنگە و وەکو تورکیا ئەم رێزێ ل بزاڤێن سەرۆک بارزانی دگرین).
ناڤهاتی ئەو یەک ژی دیار کر، نها کار بۆ تورکیایەک بێ تیرۆر دهێتە کرن، بێگومان ئەو یەک تنێ ژ بۆ تورکیا نینە، بەلکو بۆ هەموو رۆژهەلاتا ناڤین یا گرنگە، چونکی دەمێ تیرۆر و توندوتیژی نەمینیت دێ وی دەمی رەوشا دەڤەرێ ب گشتی یا ئارام بیت، دێ پەیوەندیێن تورکیا ل گەل هەموو خەلکێن دەڤەرێ باشتر لێ هێت و نها کارێن باش ژی دهێنە کرن و گۆت: (بێگومان پشتی چەک ب تەمامی هاتنە ژناڤبرن و ئێدی مەترسیا تیرۆرێ نەما وی دەمی دێ قووناغەکا دی دەستپێکەت، مە دڤێت هەموو کار ب رەنگەکێ قانوونی بهێنە کرن و پرسێن هەی ژی ب رێیا دستووری بهێنە چارەسەرکرن، بێگومان هندەک هێز جارەکا دی دخوازن ئاستەنگیان ل هەمبەر قووناغا نها ل تورکیا دروست بکەن، ب تایبەتی ژی سیاسەتا نها یا پارتا کۆماریا گەل گەلەک شاشە و ئێدی دڤێت وەلاتیێن کورد ژی د هەلبژارتنێن بهێت دا بەرسڤا پارتا کۆماری بدەن).
عومەر چەلیک ئەو یەک ژی دیار کر، سەرۆک کۆمار ئەردۆغان ب هەموو شیانێن خوە کار دکەت دا ئاشتی و پێکڤەژیان ل تورکیا هەبیت، هەلوەستێ دەم پارتی ژی هەتا نها گەلەک باش بوویە، د ناڤ جڤاکێ تورکیا دا ژی هەتا نها پشتەڤانیەکا گەلەک باش بۆ قووناغا ئاشتیێ هەیە و ژ بەر ڤێ یەکێ ژی ئێدی کەس نەشێت رێگریێ ل هەمبەر پێشڤەبرنا تورکیا دروست بکەت و گۆت: (تورکیا ل سەر رێیەکا راستە، پێدڤیا تورکیا ب ئاشتیێ و پێکڤەژیانێ هەیە، مە دڤێت پرسا کوردی و هەموو پرسێن دی ب رێیا دستوورەکێ نوو چارەسەر بکەین، پشتی شەڕ و ئالۆزی و تیرۆر نەمان بێگومان دێ دەرگەهەک نوو ڤەبیت، وی دەمی دێ گەلەک تشت هێنە ئێکلا کرن، بێگومان نەمانا تیرۆرێ و ئالۆزیان دێ بیتە ئەگەرێ بهێزبوونا تورکیا و ئەم دزانین گەلەک کەس و هێز هەنە ناخوازن تورکیا بهێز کەڤیت و جارەکا دی دخوازن ئاستەنگان دروست بکەن).
سەبارەت ب رەوشا سووریێ ژی پەیڤدارێ ئاکپارتیێ دیار کر، رەوشا سووریێ ژ بۆ تورکیا گەلەک یا گرنگە، چونکی دەمێ رەوشا سووریێ ئالۆز بیت دێ مەترسی ل سەر ئاسایشا تورکیا ژی دروست بن، تورکیا ب هەموو رەنگەکێ هاریکاریا سووریێ دکەت دا رەوشا وی وەلاتی ئارام بیت و نها پەیوەندیێن ئەنقەرە و شامێ گەلەک باشن، لێ مخابن ئێرشێن بەردەوام یێن ئسرائیلێ بووینە ئەگەرێ ئالۆزیێن نوو ل سووریێ، دڤێت ئسرائیل ئێرشێن خوە بدەتە راگرتن، تورکیا بەری نها داخواز ژ ئەمریکا ژی کریە کو رێ نەدەت ئسرائیل ببیتە ئەگەرێ روودانا ئالۆزیێن نوو ل سووریێ.
ناڤهاتی دیار ژی کر، دڤێت هەسەدە ل گۆر رێککەفتنا ١٠ ئادارێ ل گەل شامێ پرسێن هەی چارەسەر بکەت، دڤێت هەسەدە بچیتە ناڤ رێزێن لەشکرێ سووریێ، نابیت ژ بلی لەشکرێ سووریێ چو هێزێن دی یێن چەکدار ل وی وەلاتی هەبن، ئەو یەک دێ بیتە ئەگەرێ ئالۆزیێن مەزن ل سووریێ و دڤێت هەموو پێکهاتەیێن ل سووریێ بشێن پێکڤە ل سووریایەک نوو دا بژین و وەکو تورکیا ئەم هاریکاریا خەلکێ سووریێ دکەین کو پرسێن هەی چارەسەر بکەن.
