خەملا تە
سەیفوللا محەمەد
لبەر خۆدیكێ نە ڕاوەستە
وێ بەژنێ قەد نە خەملینە
چاڤێن خوە یێن ڕەش و بەلەك
چ كلا لێ نە وەرینە
خەملا تە بخوە یا جوانە
خوە هند پێڤە نە وەستینە
نە پێدڤی زێڕ و خشلایە
سینگ و بەر بەفر و كەڤینە
نافتەنگ وەك یا خەزالایە
كەمەرا لسەر نە شدینە
پرچا تە وەك نەفەلایە
چ سپرا لێ نە ڕەشینە
وان بروییا قەلەم نەكە
بروییێن تە قەیتانینە
چ سۆراڤ و چ سپییاڤا
ژ وان ڕویكا نە ڕژینە
هنارۆكێن وان ڕویكێن تە
بخوە جوان و سۆر و سپینە
كراس و فیستانێن كوردی
ل بەژنا تە هەڤهاتینە
ئێلەك و هەردو لەوەندی
ئەو تیتالێن خوڕستینە
لەوا دبێژم كەچا گوندی
جوان وەكو تە قەت نینە
جوانیا تە سروشتی یە
لەوا هندە هۆ شرینە
بێ ماسك و مكیاج كری یە
نە ستاییلێن دەمدەمینە
ئەڤا دبێژم ژ دلی یە
دل بۆ تە بئەشق و ئەڤینە
