پشككێشانا مۆندیالا جیهانی ب كۆمێن ئاگرین هاتە ئەنجامدان
ل ئەینیا بۆری پشككێشان بۆ هەلبژارتیێن دەربازبوون بەر ب مۆندیالا 2026ێ هاتنە كرن ئەوا بڕیارە ل هاڤینا سالا بهێت هەرسێ وەلاتێن ئەمریكا، كەنەدا و مەكسیك مێڤاندارییا وێ بكە تكو دهێتە هژمارتن ئێكەم مۆندیال ڕێژەیا زێدە یا هەلبژارتییان پشكدارن ئەوا دگەهنە 48 هەلبژارتیێن جیهانێ ل هەموو كێشوەران، ئەوێن هاتینە بەلاڤكرن ل سەر 12 كۆمان بڤی شێوەیی.
كۆما ئێكێ: مەكسیك، باشۆرێ ئەفریقیا، كوریا باشۆر، (دانیمارك یان مەقەدونیا باكۆر، یان چیك یان ئیرلەندا -پاشكۆیێ ئۆرۆپا)
كۆما دویێ: كەنەدا، سەركەڤتیێ ئیتالیان و ئیرلەندا باكۆر و وێلز و بۆسنە، قەتەر، سویسرا.
كۆما سێیێ: بەرازیل، مەغرب، هایتی، ئسكوتلەندا.
كۆما چارێ: ئەمریكا، باراگۆایی، ئوسترالیا(توركیا یان رۆمانیا یان سلۆڤاكیا یان كۆسۆفۆ-پاشكۆیێ ئۆرۆپا).
كۆما پێنجێ: ئەلمانیا، كۆراساۆ، ئیكوادۆر، كۆتیڤوار.
كۆما شەشێ: هولەندا، چاپان، تۆنس،( ئۆكراینا یان سوید یان بۆلەندا یا ئەلمانیا-پاشكۆیێ ئۆرۆپا).
كۆما حەفتێ: بەلجیكا، ئیران، مسر، نیۆزیلەندا.
كۆما هەشتێ: ئسپانیا، كابۆ ڤێردی، ئۆرۆگۆایی، سعۆدیە.
كۆما نەهێ: فرەنسا، سینیگال، نەرویج، (بۆلیڤیا یان سۆرینام یان ئیراق-پاشكۆیێ جیهانی).
كۆما دەهێ: ئەرجەنتین، جەزائیر، نەمسا، ئۆردن.
كۆما 11: پۆرتۆگال، كۆلۆمپیا، ئۆزپاكستان،( جامایكا یان كۆنگۆیا دیموكرات یان كالیدونیا-پاشكۆیێ جیهانی).
كۆما 12ێ: ئنگلتەرا، كرواتیا، غانا، بەنەما.
كەنگی ڤاڤارتنێن دووماهیێ نە و دەستپێكا مۆندیالێ یە
فدراسیۆنا فوتبۆلا جیهانێ دیاركر ڤاڤارتنێن پاشكۆیێ جیهانی و یێن ئۆرۆپا ژبۆ دەربازبوون بۆ مۆندیالا جیهانی دێ ل 26ێ هەتا 31ێ ئادارا سالا بهێت هێنە كرن، هەروەسان دیار كر دەستپێكا مۆندیالێ دێ ئێكەم یاری دناڤبەرا هەلبژارتیێ مەكسیك و باشۆرێ ئەفریقیا ل 11ێ خزیرانا 2026ێ ل یاریگەها ئازتیكا هێتە كرن، یارییا دووماهییا موندیالێ دێ ل 19ێ تیرمەها 2026ێ ل یاریگەها میتلایف ل باژێرێ نیۆجێرسی هێتە ئەنجامدان.
ترامب: رۆژەكا دیرۆكی یە
د دیدارەكا رۆژنامەڤانی دا دۆنالد ترامب سەرۆكێ ئەمریكا كەیفخوەشیا خوە دیار كر و گۆت: بۆ مە خەلكێ ئەمریكا رۆژەكا دیرۆكی یە، هەموو بەرهەڤی دهێنە كرن و بەرپرسێن ئەمنی ب كارەكێ مەزن ڕادبن، پێنەڤێت فوتبۆلێ هەموو وەلاتێن جیهانێ كۆمڤەكرینە و روودانەكا كێم وێنەیە، پێخوەشحالم هێشتا مۆندیال دەستپێنەكرییە پلێتێن یاریگەهان ب ڕێژەكا مەزن هاتینە فرۆتن، ئەڤەژی بەلگەیە فوتبۆلێ جەماوەرەكێ مەزن هەیە، ب ئۆمێدم مۆندیال سەركەڤتیانە بڕێڤەبچیت.
بۆ زانین دۆنالد ترامب وەكو ئێكەم كەس و سەرۆك وەلاتەك خەلاتێ فیفایێ یێ ڕێزگرتنێ وەردگریت، ژبەر بزاڤێن وی بۆ باشترین شێوە مۆندیالا جیهانی 2026ێ بهێتە بڕێڤەبرن، ئەڤ خەلاتە بۆ جارا ئێكێ یە فیفا بۆ كەسەكی ددانیت.
رۆنالدۆ: دێ درێژترین مۆندیال بیت
د دیدارەكێ دا چیڤانۆكێ جیهانی و شرۆڤەكارێ وەرزشی یێ بەرازیلی رۆنالدۆ نازاریۆ گۆت: ئێكەم مۆندیالە ب پترین هەلبژارتی و سێ وەلاتێن جیهانی، ئەڤە ژی دێ بیتە بارگرانیەك ل سەر وەلاتێن میڤان و هەلبژارتیێن پشكدار، دبیت هەتا جەماوەرێ جیهانێ د هندەك یارییان دا بێ زاربن و دبیتە درێژترین مۆندیال د دیرۆكا ڤێ قارەمانیێ دا، هەرچەندە ناسنامێ قارەمانیێ بۆ دانا ئیك ژ هەلبژارتییان وەكو پێشبینی ب زەحمەتە لێ دبیت ئسپانیا پتری هەموو هەلبژارتیێن دی چەنس هەبیت.
دەلیڤەیا مۆندیالێ بەرانبەر ئیراقێ یە
د پاشكۆیێ جیهانی دا شەش هەلبژارتنێن كێشوەران ژبلی یا ئۆرۆپا ل دووڤ ڕێزبەندییا وان د فیفایێ دا بڤی خشتە هاتیە، هەلبژارتیێ بۆلیڤیا- هەلبژارتیێ سۆرینام، سەركەڤتیێ وان دێ بەرانبەر هەلبژارتیێ ئیراقێ بیت، دووڤدا سەركەڤتیێ یارییا بەرانبەر ئیراقێ ئێكسەر دێ دەربازبیتە مۆندیالێ، هەلبژارتیێ جاماكیا- هەلبژارتیێ كالیدونیا، سەركەڤتیێ وان دێ كەڤیتە بەرانبەر كۆنگۆیا دیموكراتی، دووڤدا سەركەڤتییا یارییا بەرانبەر كۆنگۆیێ دێ پلێتا دەربازبوونێ مسۆگەر كەت.
