زڤستان
عەبدولڕەحمان مەحموود
زڤستان..
یا ب بەفر و پڕ بارانە
مژ و سەرما و هڕ و بانە
گڕگڕا عەور و دەنگێ
برویسیانە
ل سەرێ چیا، مشت بەفر و
قەب قەبا کەوانە
خۆشیێن وێ:
شەڤبێری و
ئاگرێ سۆپەیێن دارانە
ڤەلۆرینا ئاواز و سترانێن
کۆچک و دیوانانە
چیڕۆک و سەرهاتیێن
حاکم و بەگلەرانە
شەڤەڕۆک و یاریێن
فۆلکلۆری و سەمایا
گەنج و لاوانە
خوارنا کتک و گیز و
کەزانانە
ڕۆژا لیان و بەفریانە
کەلاندنا کولند و
بژارتنا بەڕویێن ناڤ پەلانە
ئەو دەرمانە.. زڤستانە،
زەوالا مێش و مۆرانە.
