چو ڕاستی بۆ دوورئێخستنا یاریزانان نینە و چاڤدێرییا هێرشبەرەكێ سۆپەر دكەین
د دیدارەكێ دا سكرتێرێ یانەیا دهۆك یا وەرزشی بۆ رۆژنامەیا ئەڤرۆ دیار كر تیما وان بەردەوامە ل سەر بەرهەڤیێن خوە بۆ یاریێن داهاتی یێن خولا ستێرێن ئیراقێ یا فوتبۆلێ و ئەو گۆتگۆتێن ل سەر دوورئێخستنا یاریزانان ب دوور ڕاستیێ دانە دیاركرن.
زێدەتر جاسم محەمەد حاجی گۆت: پشتی ڕاوەستیانا خولێ ژبەر پشكدارییا هەلبژارتیێن ئیراقێ یێ نشتیمانی و ئۆلمپی د قارەمانیێن دەرڤە دا، وەكو كارگێری دگەل كادرێ ڕاهێنانێ مە پلانەكا ڕێكخستی بۆ تیمێ دانایە پێخەمەت وەرگرتنا مفایی ژ ڕاوەستیانێ تایبەت بۆ چارەسەكرنا كێماتیێن داناڤ تیمێ دا یێن هونەری و تەكتیكی، هەتا نوكە دو یاریێن هەڤالینی دگەل كەرخێ مە مفایەكێ باش ژێ وەرگرتییە، سەرباری ئەڤ ڕاوەستیانە كارتیكرنا خوە یا دەرۆنی ل سەر تیمێ هەیە، ژبەركو هێشتا چو ژڤانێن دروست بۆ ڤەگەڕیانا یاریێن خولێ نینە.
ژلایەكێ دووڤە ناڤهاتی ڕەدكر كو هیچ یاریزانەك نە دوورئێخستیە و گۆت: ئەوان دەنگۆیێن دناڤا سۆشیال میدیایێ دا بەلاڤبووین ل دور دوورئێخستنا هەر یاریزانەكی دوورن ژ ڕاستیێ و ئەڤ بابەتە نە هاتییە بەحسكرن ب تنێ ئەم چاڤەڕێ ڕاپۆرتێن ڕاهێنەری نە ل دووڤ داخوازییا وی چ پێدڤی بیت دێ بۆ هێتە دابینكرن پێخەمەت باشترین شێوە تیما مە یا بەرهەڤبیت، لێ ئەم یێ دۆڤچوونا هێرشبەرەكێ سۆپەر دكەین بۆ هندێ ئەو كێماسییا ل هێلا هێرشبەریێ چارەسەربكەین، پێنەڤێت ئەڤە ژی دەم بۆ دڤێت و هێشتا ژڤانێ ڤەگوهاستنێن زڤستانێ نە هاتیە ڤەكرن، هەردەمێ ڤەبوو دێ ئەڤ بابەتە ژی هێتە ئێكلا كرن.
ل دۆر بەرهەڤیێن تیمێ بۆ خولێ ژی گۆت: د نوكە دا تیم یا د دەمەكێ هەستیار دا و ل دووڤ پلانا كادرێ ڕاهێنانێ ل سەر بەرهەڤیێن خوە بەردەوامن، ئەم چاڤەڕێ فدراسیۆنا فوتبۆلا ئیراقێ نە ژبۆ دانانا دەمەكێ نێزیك بۆ دەستپێكرنا خولێ، هیڤییا من ئەوە ژ جادەیا وەرزشی هیچ بابەتەكێ نە ڕاست ل سەر یاریزانان بەلاڤ نەكەن ئەڤ چەندە ژی كارتیكرنا خو ل سەر یاریزانان دكەن، وەكو كارگێری ژی یا دشیان دا بیت بۆ ب هێزكرنا تیمێ و باشترین بەرهەڤیێن وێ بەردەوامن و گەشبینن دێ بۆ یاریێن داهاتی ئاست و شیانێن تیما مە باشتر بن.
بۆ زانین تیما یانەیا دهۆك قارەمانا كۆپا ئیراقێ د ئاستەكێ نە خوەجێگری دا یە ئەوا ژ حەفت یارییان سەركەڤتنەك، دو وەكهەڤی و چار خوسارەتی هەنە ب كۆمكرنا پێنچ خالان ڕێزا 16ێ دهێت.
