نامەیا ئەڤ شەڤە ژی بخوینە
رێژین حكمەت
ئەڤ شەڤە دیدارا من
نە وەکی دیدارا بەرێیە
چونکی تو ھەر بێ دەنگی
بێ دەنگیا تە
دەنگێ من
ل ھەمی سنوورێن ل جیھانێ بەزاندن..
د دلێ مندا
ئەشقا تە یا هەی
مێشکێ من
روحا من
هەناسا من یێن تەنە
ئەو ناما ل ڤان شەڤێن درێژ من بۆ تە دنڤێسی
ب بێ دەنگی بخوینە
داکو تێکەلی ناخێ تە بیت.
وەسا بخوینە
هەستێن تە باخڤن
بێژن ئەو یا د خوینیت ب دەنگێ خۆ
ب نازکی و ب جوانی بخوینە..
ئەم چ جاران بێ ئێک نەبوون
بێ ئێک ژی نابین
قەرەبالغی و بتنێبوونا من ژی تو بووی
هەمبێزا تە ژی یا من بوو.
تو دزانی
یا من ژ دەستدایی
ئارامبوونا من بوو
د باوەشا تەدا
د باوەشا پەیڤێن تەدا و
باوەشا ھەناسەیێن تە
دگەل ھەر ھەناسەیەكێ
من دزانی ئەزا ھەیم.
تو ئەو رۆناهی بووی
یا رۆژا من رۆن دکەت
ئەو هەیڤا چاردە شەڤی بووی
یا شەڤا من گەش دکەت
ئەو ستێرا ئەسمانی بووی
یا من رەنگین دکەت.
تو دزانی
من ئەڤرۆ شعرەک دخواند
دگۆت:
هندەک کەس دبێژن، حەز ژ تە دکەم
چونکی یا ژ بەرکرین
هندەک نەشێن بێژن،
چونکی گەلەک حەز ژێ دکەن
ئەز هەمی دەما بێ دەنگ دبم
چونکی ژ دل ژی حەز ژ تە دکەم
بێ دەنگییا من، بەرسڤا تە ددەت..
تو حەز ژ رەنگێ لێڤێن من دکەی
یێن دەمێ شەرم دکەم سۆردبن
حەز ژ رەنگێ روویێ من دکەی
یێن دەمێ بەرێ خوددەیێ گەش دبن..
ئەڤ شەڤە
ئەری ئەڤ شەڤە، من ل گەل ھەیڤێ ژڤانە
شعرەک دناخێ من دایە
بەرپەرەکێ سپی
ب پەیڤێن من یا خەملا خۆ دکەت..
دڤێ شعرێدا
تو مێهڤان بووی
تو ئەو جوانی بووی
یا د بەهەشتێ دا
ئەو رۆناهی بووی
یا ژ جاران گەشتر
ئەسمانی
تو وەسا یێ د ھەمبێزا خۆ دا ئاسێکری
جیھان ب ھەمی بلندیێن خۆ ڤە
ناگەھیت تە،
ئەڤ شەڤە دێ چیڕۆک درێژ بیت
چایا مە دێ ژ چایا جاران خۆشتربیت
چونکی ئەم ئێک دلین
د دوجەستەیان دا
خۆ ئەگەر مە گوھـ ل چركێنا
تێكڤەدانا پیالێ ژی نەبیت.
