سێ هەیڤ و ئێك شەڤ
ڕۆژا مزووری
دەمارەک دسەری دا ببوو دل!
لێدانێن وی
هزر و بیرهاتن دگەزتن..
بیرۆكە و دلینی
پێكڤە دنویسان و ل سەر ئەنیا
شەڤا درێژ یا تنێبوونێ
دادگەهـ ب من دكر..
ڤی ئێستگەهی
تەمەنێ من یێ بچویك
د نیڤا دەستێ خۆ دا دكرە
شەڤا وەرزەکێ بێ دوماهیک
روح ب خەما ئەزەلێ باركری
ما دێ چاوا گەهیت…
شەڤ درێژ و ڕەش
وەسا ب ڤەلەرزینا خۆش..
چاڤێن مەزن ژ خەوێ سل دکرن
و دگۆتێ:
تو چویچكا سەرێ دارەكێیی
و ئەز دارستانەكا ب مژ و مۆرانم..
پێلەکا ساڕ د گیانێ لاواز دا دگەڕییا
دڤییا گەرماتییەکێ هەمبێزبکەت
نە هەمبێز ئامادەبوو ببیت هێلین
و نە گەرماتییێ ڕویبڕیبوونا سڕێ هەبوو..
هزرێن شێت مێشک دبژارت
ل هیڤییا ڕۆژەکا نە ئاڤا وەستییا بوو
ڤیان وەکی ژەهرەکێ بلەز بەلاڤ دکر
چپک چپک کۆمدکر و
ب جارەکێ دبەخشی!
لێڤێن هشکبووی ژ چپکان حەزدکر..
دەنگ تێهنییێ پەیڤێن بۆری بوو
دڤێت خۆ ڕزگاربکەت ژ دوبارەبوونێ
ڕێکەکا بێ ڕاست و چەپ ددیت!
دچوو لێ ڕابردوویی هەر گازی دکرێ
مێراتی ژ ئاڤەکا زەلال وەرگرتبوو
من بەرزەبوویەکێ بەردەوام ددیت.
دئێشام، وەکی لاپەڕەکی لبن پێنوسەکێ تیژ
خۆ د شوویشت ژ کانیکا هەستێن پەقی!
چیایەکێ بلند د هناڤان دا ئاڤاکربوو
دسینگێ پەنجەرەیەکا گرتی دا ل بەندا
ڕۆناهی و بایەکێ فێنک ڕووینشتبوو
ژمێژە گیانەکێ وەکی من ئافراندبوو
بەری من بخوینیت، نڤیسیبووم
بەری من ببینیت، نیاسیبووم
داخوازا گوهۆڕینێ دکر،
پشتی هزار جاران
ئەز ب دەستێن خۆ ئافراندیم!
