دێ باشترینێن سالا 2025ێ ڕاگەهینیت و پشتەڤانێن زاخۆ بەربژارێن ب هێزن
چاڤەڕێ دهێتە كرن ئەڤرۆ ل دەمژمێر هەشت شەڤ هەموو جیهان ب گشتی و كوردستانی ب تایبەتی چاڤ ل كەنال و پەیچێن سۆشیال میدیایێ بن ژبۆ دیتنا ڕێ و رەسمێن ئاهنگا ژێگرتنا باشترینێن جیهانێ بۆ سالا 2025ێ (the best) ل پایتەختێ قەتەر دەوحە هێتە كرن ئەوا سالانە ژلایێ فدراسیۆنا فوتبۆلا جیهانێ(fifa) ڤە دهێتە ڕێكخستن وەكو ڕێزگرتن بۆ كۆمەكا یاریزان، ڕاهێنەر، پشتەڤان، یانە و هەلبژارتیێن فوتبۆلێ ل سەر ئاستێ كوڕان و كچان.
پشتەڤانێن زاخۆ نوونەرا ئاسیانە
بۆ جارا ئێكێ یە د دیرۆكا كێشوەرێ ئاسیا و كوردستانێ و ئیراقێ پشتەڤانێن یانەیا زاخۆ دناڤ بەربژارێن سەرەكی یێن بۆ وەرگرتنا خەلاتێ باشترین جەماوەری هاتینە دەستنیشانكرن ئەوا دهێتە پێشبینیكرن ل سێ شەمبییا بهێت ئاهنگا خەلاتكرنێ ل وەلاتێ سویسرا ب بەرهەڤبوونا نوونەرێن بەربژاران و كەسانێن بەرنیاس یێن یارییا فوتبۆلێ.
هەموو كوردستانیان ب دەنگ و دل دگەل زاخۆ نە
د ماوەیێ نێزكی مەهەكێ دا هەلمەت، جالنچ و كەمپینەیێن پشتەڤانیێ بۆ یانەیان زاخۆ ل سەر ئاستێ كوردستانێ و ئیراقێ هاتبوونە كرن، سەرۆك بارزانی، مەسرۆر بارزانی سەرۆكێ حوكمەتێ، نێجیرڤان بارزانی سەرۆكێ هەرێمێ، محەمەدشیاع ئەلسودانی سەرۆك وەزیرێن ئیراقێ و پارتی دیموكراتی كوردستان ب هەموو جەماوەرێ خوە ل هەموو لەقا و ڕێكخستنان و پرانییا بەرپرسێن حوكمی و حزبی هەلمەتا دەنگانی ب پشتەڤانێن یانەیا زاخۆ دایە وەكو ئەركەكێ نشتیمانی، ب هیڤییا وێ یەكێ بشێن پترترین دەنگێن پێدڤی بینیت و ببنە باشترین پشتەڤانێن یارییا فوتبۆلێ ل سەر ئاستێ جیهانێ.
سكرتێرێ یانەیا زاخۆ گەشبینە ببنە هژمارەیا ئێك
د داخویانیەكێ دا بۆ رۆژنامەیا ئەڤرۆ هشیار شەهباز سكرتێرێ یانەیا زاخۆ گەشبینییا خوە دیاركر كو دێ بنە هژمارەیا ئێك و گۆت: د نامەیەكا ئێمیلی سەرۆك یانەیا مە هاتییە ئاگەهداركرن كو ڕێورەسمێن ژێگرتنا باشترینێن جیهانێ دێ ل 16ێ ڤێ مەهێ ئانكو ئەڤرۆ ل قەتەرێ هێتە ڕێكخستن كو دێ ئەنجامێن دووماهیێ یێن باشترین پشتەڤان ل سەر ئاستێ جیهانێ هێنە ڕاگەهاندن، هەرچەندە ل دووڤ سیستەمێ ڕێكخستنێ هەرسێ بەربژارێن پشتەڤان بەرهەڤ نابن دێ بڕێییا ئۆنلاینێ هێتە نیشاندان پشتی داخواز ژ مە كرین بۆ هنارتنا چەند كورتە ڤیدیۆیەكێن پشتەڤانێن یانەیا زاخۆ، لەوما ژی ئەم گەشبینن دێ هژمار ئێك بین.
پشتەڤانێن زاخۆ دێ ئاهنگا گێڕن
هەروەسان سكرتێرێ یانەیا زاخۆ دیار كر دێ ئەڤرۆ پشتەڤانێن زاخۆ و كارگێرییا یانەیێ بەرهەڤییان بۆ دانانا ئاهنگان ل جهێن جودا ژ وانا پرا دەلال و گۆت: بۆ مە گرنگە كەیفخوەشییا جەماوەرێ مە ئەوێن ل سارمایێ و گەڕمێ ب دەنگێن بلند گازی كرن زاخۆ، چوونا پشتەڤانێن زاخۆ ب خوە دناڤ لیستا باشترینێن جیهانێ دەستكەڤتە بۆ كوردستانێ و ئیراقێ و ئاسیا، هیڤییا مە ئەوە ئەڤرۆ مزگینیەكا دیرۆكی ب گەهیتە كوردستانێ.
دگەل ڤەكرنا پرۆسێسا دەنگان یانەیا زاخۆ ل شەشێ مەها بۆری دەست ب دانانا كەمپینەیا كۆمڤەكرنا دەنگان بۆ پشتەڤانێن زاخۆ و پرۆسێسە هەتا 28ێ هەمان مەهە یا بەردەوام بوو، ل دووڤ ژێدەرێن جودا دبیت دەنگێن زاخۆ گەهشتبنە نێزیكی ملیۆن دەنگان، لێ ئەنجامێ دووماهیێ دێ د دناڤا فدراسیۆنا فیفایێ دا هێتە دیار كرن، ئەوا هیچ نوونەرەكێ بەربژارێن سەرەكی بەرهەڤ نابن و دێ بەری دەستپێكرنا ڕێورەسمێن ئاهنگێ هێتە ڕاگەهاندن.
كینە بەربژارێن باشترینێن جیهانێ؟
ل دووڤ لیستەیا هاتیە بەلاڤكرن، كو دێ خەلات بۆ باشترین یاریزانێ كوڕ، كچ، باشترین راهێنەر كوڕ و كچ، باشترین گۆلپارێزێ كوڕ و كچ، باشترین گۆلپارێز- كور و كچ، دیسان یارییا پاقژ بۆ تیمەكێ Fair Play Award، باشترین پشتەڤان FIFA Fan Award، باشترین پێكهاتیێ سالێ كوڕ و كچ.
بەربژارێن باشترین پشتەڤان
پشتەڤانێن یانەیا زاخۆ- نیشاندانەكا جوان د یارییا وان بەرانبەر حدود ل وەرزێ بۆری ژ خولا ستێرێن ئیراقێ دیاركربوو پشتی هاڤێتنا یاریێن زارۆكا بۆ نەساخێن پەنچەشێرێ.
پشتەڤانێ ئسپانی مانۆلۆ ئیل دل بۆمبۆ ئەوێ چوویە بەردلۆڤانییا خودێ ئێك ژ دلسۆز و وەفادارێن پشتەڤانان بوو.
یێ ئەرجەنتینی سیجانۆتۆ ئەوێ چیرۆكێن ئازرین و هەڤڕك د ناڤا پشتەڤانێن فوتبۆلێ دا هەیی.
یاریزانێن بەربژار- كوڕان
عوسمان دیمبلی- فرەنسا، كێلیان مباپی- فرەنسا، ئەشرەف حەكیمی- مەغرب، هاری كین- ئنگلتەرا، نونو میندێچ- پۆرتۆگال، كۆل بالمەر-ئنگلتەرا، بێدرێ- ئسپانیا، راڤینیا- بەرازیل، محەمە سەلاح- مسر، ڤیتینیا- پۆرتۆگال، لامین یامال- ئسپانیا.
یاریزانێن بەربژار- كچان
هەر ئێك ژ ساندی بالتیمۆر-فرەنسا، ناتالی بیۆرن- سوید، ئیتانا بۆنماتی- ئسپانیا، لۆسی برۆنز- ئنگلتەرا، ماریۆنا كالدینتی- ئسپانیا، تیموا چاوینگا- مالاوی، كادیدیاتۆ دیانی- فرەنسا، میلێچ دۆمۆرانای- هایتی، باتری جیخارۆ- ئسپانیا، لیندسی هێبس- ئەمریكا، لۆرین جێمس- ئنگلتەرا، لۆی كێلی- ئنگلتەرا، ئیڤا بایۆر- پۆلەندا، كلاودیا بینا- ئسپانیا، ئەلێكسیا بۆتیاس- ئسپانیا، ئەلێسیا رۆسۆ- ئنگلتەرا، لیا وێلیامسۆن- ئنگلتەرا.
ڕاهێنەرێن بەربژار- كوڕان
خافیێر ئەگێری- مەكسیك، لویس ئەنرێكی- پاریس سانجێرمان، میكێل ئارتینا- ئارسنال، هانز فلێك- بەرشەلۆنا، ئینزۆ ماریسكا- چێلسی، رۆبێرتۆ مارتینێز- پۆرتۆگال، ئارنی سلۆت- لیڤەرپۆل.
راهێنەرێن بەربژار- كچان
سۆنیا بۆمباستۆر- چێلسی، جوناتان خێرئەلدێز- لیۆن، سیپ هێنێز- ئۆرلاند براید، ئرینی سێلكێرز- ئارسنال، سارینا وێگمان- ئنگلتەرا.
گۆلپارێزێن بەربژار- كوڕان
یێ بەرازیلی ئالیسۆن پیكەر- لیڤەرپۆل، یێ ئەرجەنتینی ئیمیلیانۆ- ئاستۆن ڤێلا، یێ بەلجیكی تیبۆ كۆرتۆا- ریال مەدرید، یێ ئیتالی جیانلۆیجی دونارۆما- مان ستی، یێ پۆلەندی فۆتچیك چیچیسنی- بەرشەلۆنا، یێ ئسپانی داڤید رایا- ئارسنال، یێ ئەلمانی مانوێل نویەر- بایرن میۆنخ، یێ سویسری یان سۆمەر- ئینتەر میلان.
گۆلپارێزێن بەربژار- كچان
یا ئەلمانی ئان كاترین بێرگر- جۆسام، یا ئسپانی كاتا كۆل- بەرشەلۆنا، یا ئنگلتەرایێ كریستیان ئیندلەر- لیۆن، یا ئەنگلتەرایێ هانا هامبتۆن- چێلسی، یا ئنگلتەرایێ ئانا مۆرهاوس- ئۆرلاندۆ براید، یا نێجیری چیاماكا نادۆزیێ- پاریس، یا ئەمریكی فالۆن تۆلیس- مان یۆتایتد.
