بۆ وەرگرتنا پۆستێ سەرۆك وەزیران مالكی یێ بەرهەڤە میلیشیایان ژ چەك بكەت
د لڤینەكا سیاسی یا چاڤەڕێنەكریدا كو دبیت هەڤكێشەیا هێزێ ل ئیراقێ ب تمامی ب گوهۆڕیت، نوری مالكی كارتێن خوە یێن نهێنی بۆ واشنتۆنێ ئاشكرا دكەت.
ل دووڤ چاڤدێرێن سیاسی و ڤەكۆلینێن هەوالگیری، نوری مالكی، سەرۆكێ هەڤپەیمانییا دەولەتا قانوونێ بەرهەڤییا خوە نیشادایە دەستێ خوە بۆ پیرۆزترین هێلا سوور یا ناڤمالا شیعی ببەت كو چەكدانانا گرۆپێن میلیشیایە، ب مەرجەكی ئەمریكا گلۆپا كەسك بۆ هەلكەت تاكو جارەكادی ل سەر كورسییا دەستهەلاتا ئێكێ یا ئیراقێ روونیت.
پەیمانگەها ئەمریكی بۆ ڤەكۆلینان ل دۆر شەڕی (ISW) د نووترین هەلسەنگاندنا پەردە ل سەر مانۆرەكا سیاسی یا نوری مالكی لادایە
ل دووڤ خواندنا وێ پەیمانگەها ئەمریكی، مالكی پەیامەكا رۆهن ئاراستە ئەمریكا كریە كو ناڤەڕۆكا وێ ئەو یێ بەرهەڤە روو ب روویێ گرۆپێن چەكدار ببیت و چەكێن وان ژێ وەرگریت، هەكە د بەرانبەردا واشنتۆن پشتەڤانییا تمام یا وی بكەت بۆ وەرگرتان پۆستێ سەرۆك وەزیرێن ئیراقێ ل قووناغا داهاتی.
ئەڤ پێشنیازا مالكی د وەختەكیدایە كو لڤینێن د ناڤ چارچۆڤەیێ هەماهەنگیێدا بۆ ئێكلاكرنا شێوازێ حوكمڕانییا داهاتی دەستپێكریە.
پێزانین ئاماژە ب وێ چەندێ دكەن كو سەركردەیێن چارچۆڤەیێ هەماهەنگیێ مژوولی گەنگەشەكرنا ناڤێن چەند بەربژارانە بۆ سەرۆكایەتییا حوكمەتا داهاتییا ئیراقێ، ناڤێ نوری مالكی ژی وەك ئێك ژ ب هێزترین و دیارترین ناڤانە ل سەر مێزا دانوستاندنان.
دبیت مالكی ب ڤێ ئۆفەرێ بزاڤێ بكەت خالا لاواز یا خوە ل دەف رۆژئاڤای، كو هەڤبەندییا وێ یا ب هێزە ل گەل بەرەیێ موقاوەمێ، بكەتە خالا ب هێز و وەك تاكەكەس خوە نیشا بدەت كو شیانێن كۆنترۆلكرنا رەوشا ئەمنی هەنە. ئەڤە ژی هەڤدەمە ل گەل بەردەوامییا فشارێن توند یێن ئەمریكا ل سەر حوكمەتا فیدرالییا ئیراقێ بۆ هەلوەشاندنا پێكهاتەیێ حەشدا شەعبی و دووماهیئنان ب دەستهەلاتا گرۆپێن چەكدار ل دەرڤەی كۆنترۆلا دەولەتێ.
