فیفایێ باشـترینێن جیهانێ دیاركرن و پشـتەڤانێن زاخۆ بوونە ئێكەمێن جیهانێ
ب شێوەیەكێ فەرمی فدراسیۆنا فوتبۆلا جیهانێ (FIFA) وەكو باشترین پشتەڤانێن جیهانێ بۆ سالا 2025ێ هاتنە دیاركرن، پشتی د ڕاوەگرتنا جەماوەری یا سەر ئاستێ جیهانێ بۆ سێ بەربژاران هاتیە كرن، د چارچووڤەیێ ژێگرتنا باشترینێن جیهانێ (the best) ژلایێ فیفایێ دهێتە دان، دوهی د ڕێورەسمێن ئاهنگەكا بەرفرەهـ دا ژبۆ ژێگرتنا باشترینێن جیهانێ ل پایتەختێ قەتەر دەوحە هاتبوو ڕێكخستن كو سالانە ژلایێ فدراسیۆنا فوتبۆلا جیهانێ ڤە دهێتە دانان وەكو ڕێزگرتن بۆ كۆمەكا یاریزان، ڕاهێنەر، پشتەڤان، یانە و هەلبژارتیێن فوتبۆلێ ل سەر ئاستێ كوڕان و كچان.
پشتەڤانێن زاخۆ دیرۆك تۆمار كر
پشتەڤانێن زاخۆ ب نڤێسانا زێری چوونە د دیرۆكا فوتبۆلا جیهانی دا كو بۆ جارا ئێكێ یە د دیرۆكا كێشوەرێ ئاسیا و كوردستانێ و ئیراقێ ببنە باشترین پشتەڤان ل سەر ئاستێ جیهانێ، پشتی شیایی پترترین دەنگان كۆمڤەكەت و پێشكەڤیت ل سەر هەردو هەڤڕكێن خوە، پشتەڤانێ ئسپانی مانۆلۆ ئیل دل بۆمبۆ ئەوێ چوویە بەردلۆڤانییا خودێ ئێك ژ دلسۆز و وەفادارێن پشتەڤانان بوو، دیسان یێ ئەرجەنتینی سیجانۆتۆ ئەوێ چیرۆكێن ئازرین و هەڤڕك د ناڤا پشتەڤانێن فوتبۆلێ دا هەیی.
زاخۆ چەوا بەربژار بوو
ل 13ێ ئەیارا ئەڤ سالە پشتەڤانێن یانەیا زاخۆ نیشاندانەكا جوان د یارییا وان بەرانبەر حدود ل وەرزێ بۆری ژ خولا ستێرێن ئیراقێ دیاركربوو پشتی هاڤێتنا یاریێن زارۆكا بۆ ناڤ یاریگەهێ دا، دووڤدا كارگێرییا یانەیا زاخۆ ئەو یاریێن زارۆكا بۆ نەخۆشێن ئێشا پەنجەشێرێ بەلاڤكرن، ئەڤ روودانە بوو جهێ پووتەدانا بەرپرسێن فیفایێ و ب فەرمی وەكو ئێك ژ بەربژاران دناڤا خەلاتێ باشترینێن جیهانێ دانابوو.
سەركەڤتنا زاخۆ ب ئێك دەنگییا كوردستانییان بوو
د ماوەیێ نێزكی مەهەكێ دا هەلمەت، چالنچ و كەمپینەیێن پشتەڤانیێ بۆ یانەیا زاخۆ ل سەر ئاستێ كوردستانێ و ئیراقێ هاتبوونە كرن، سەرۆك بارزانی، نێچیرڤان بارزانی سەرۆكێ هەرێمێ، مەسرور بارزانی سەرۆكێ حوكمەتێ، محەمەد شیاع ئەلسودانی سەرۆك وەزیرێن ئیراقێ و پارتی دیموكراتی كوردستان ب هەموو جەماوەرێ خوە ل هەموو لەقا و ڕێكخستنان و پرانییا بەرپرسێن حوكومی و حزبی هەلمەتا دەنگانێ ب پشتەڤانێن یانەیا زاخۆ دایە وەكو ئەركەكێ نشتیمانی، هەروەسان دناڤا خەلكێ كوردستانا رۆژهەلات، رۆژئاڤا و باكۆر و دیسان ل سەر ئاستێ ئیراقێ و وەلاتێن ئۆرۆپا ژی دەنگ بۆ یانەیا زاخۆ چوبوون و شیان ( حەفت ملیۆن و 493 هزار و 957 دەنگان) بدەستڤە بینن و پێشكەڤن ل سەر پشتەڤانێ ئسپانی مانۆلۆ ئیل دل بۆمبۆ و یێ ئەرجەنتینی سیجانۆتۆ.
سەرۆك بارزانی
پەیاما پیرۆزباهیێ گەهاند
سەرۆك مەسعود بارزانی ب ڕێیا تلەفۆنێ ل گەل گوهدار شێخۆ سەرپەرشتێ ئیدارا سەربەخوەیا زاخۆ پیرۆزباهییا یانەیا زاخۆ و جەماوەرێ وێ كر، خوەشحالییا خوە دیاركر و پیرۆزباهییا هەموو خەلكێ كوردستانێ و خەلكێ زاخۆ و پشتەڤانێن یانەیێ كر، ب هەلكەڤتا ب دەستڤە ئینانا ناسناڤێ باشترین پشتەڤانێن وەرزشی ل سەر ئاستێ جیهانێ كو ژلایێ فدراسیۆنا فوتبۆلا جیهانێ FIFA بۆ سالا 2025ێ خەلاتێ باشترین پشتەڤان بۆ یانەیا زاخۆ هاتیە دان، سەرۆك بارزانی ئەڤ ناسناڤە ب دیرۆكی وەسف كر و هیڤییا سەركەڤتنێ بۆ یاریزان و یانەیا زاخۆ خواست.
نێچیرڤان بارزانی
پیرۆزباهی ل یانەیا زاخۆ كر
سەرۆكێ هەرێما كوردستانێ نێچیرڤان بارزانی پیرۆزباهیێن خوە ئاراستەیی یانەیا زاخۆ كر پشتی ب دەستڤەئینانا خەلاتێ باشترین پشتەڤان ل جیهانێ و بەلاڤكرییە: بەرێزان سەرۆك و دەستەكا كارگێری و پشتەڤانێن زاخۆ ب گەرمی پیرۆزباهییا ئەڤێ دەستكەڤتا جیهانی ل هەوە دكەم كو پشتەڤانێن دلسۆزێن زاخۆ ژلایێ فیفایێ وەكو باشترین و كاریگەرترین پشتەڤان ل سەر ئاستێ جیهانێ دەستنیشان كرن، ئەڤ ناسناڤێ جیهانی تەناها سەركەڤتنەك نینە بۆ زاخۆ بەلكو شانازییە بۆ هەموو وەرزشا هەرێما كوردستانێ و ئیراقێ، ئەم ب جۆش و خرۆش و شێوازێ شارستانییا پشتەڤانان ل یاریگەهێن هەوە كربوو تابلۆیەكا هونەری یا جوان و پەیاما ئاشتیێ و خۆشتڤیێ و ژیان دۆستییا گەلێ كوردستانی بۆ جیهانێ گەهاند، دلسۆزی و وەفادرییا خەلكێ خۆشتڤیێ زاخۆ بۆ یانەیا خوە نموونەیەكا بلندە، هیڤیدارین هەردەم وەكو پێشەنگ بمینن و پشتەڤانێن ب هێز بن بۆ پێشكەڤتن و بلندڕاگرتنا ناڤێ كوردستانێ، دوبارە پیرۆزباهیێ ل هەوە دكەم و هەر سەربەرز و سەركەڤتی بن.
مەسرور بارزانی
پەیاما پیرۆزباهیێ بەلاڤكر
د نڤێسارەكا پیرۆزباهیێ دا مەسرور بارزانی سەرۆكێ حوكمەتا هەرێما كوردستانێ ب گەرمی پیرۆزباهیێن خوە ئاراستەیی كارگێری و پشتەڤانێن یانەیا زاخۆ و هەموو كوردستانیان كر و بەلاڤكرییە: سەركەڤتنەكا مەزنە بۆ وەرزش و پشتەڤانێن كوردستانێ و ئیراقێ.
سەرۆك وەزیرێن ئیراقێ ژی
پیرۆزباهی گەهاند
محەمەد شیاع ئەلسودانی سەرۆك وەزیرێن ئیراقێ پیرۆزباهی ل یانە و پشتەڤانێن زاخۆ كر و دیاركر ئەڤ سەركەڤتنە بۆ هەموو گەلێ ئیراقێ و كوردستانێ یە و سۆپاسییا هەر كەسەكێ بڕییا دەنگان پشتەڤانێن زاخۆ كرینە هژمارە ئێك ل جیهانێ و داخوازا سەركەڤتنێ بۆ هەمی یانەیان خواست.
مەكتەبا ڕێكخستنا پارێزگەها دهۆكێ پیرۆزباهییەك بەلاڤكر
بهـەلكەفتا بدەستڤەئینانا خەڵاتێ زەبێست بۆ باشترین هاندەر ل سەر ئاستێ جیهـانێ بناڤێ بەرپرس وهاریكار و ئەندامێن مەكتەبا رێكخستنا پارێزگەها دهۆكێ گەرمترین پیرۆزباهـیان ئاراستەیی سەرۆک و راهێنەر و دەستەیا کارگێری و یاریزان و پشتەڤانێن یانا زاخۆ و هەمی خەڵكێ كوردستانێ دكەین
بدەستڤەئینانا خەڵاتێ باشترین هاندەر ژ لایێ فیفایێ ڤە دەستكەفتەكا زێرینە بۆ یانێ و هەمی گەلێ كورد و جهێ شانازیێ یە کو پشتەڤانێن یانا زاخۆ شیاینە ببنە هەڤرکێن دوو وەلاتێن زلهێزێن جیهانێ مینا (ئسپانیا، ئەرجەنتین) و ب پشتەڤانیا گەلێ كورد ببنە باشترین پشتەڤان و خەلاتێ فیفایێ ب دەستڤە بینن
هیڤیدارین كو ئەڤ خەلاتە ببیتە هاندەر بۆ بەرەڤ پێشڤەچوونا بیاڤێ وەرزشێ ل هەرێما كوردستانێ و عێراقێ هەروەسا ببیتە پشتەڤان بۆ بدەستڤەئینانا دەستكەفتێن زێرین ل سەر ئاستێ ناڤخۆ و دەرڤە، دلسۆزی و وەفاداریا دەنگدەران بۆ یانا زاخۆ جهـێ رێز و پێزانینێ یە ئەف خەڵاتە ل مە هەمیا پیرۆزبیت و هیڤیا سەركەفتنێت زێدەتر.
پارێزگارێ دهۆكێ ژی پیرۆزباهی گەهاندن
هەر ل سەر بابەتێ پیرۆزباهییان د. عەلی تەتەر پارێزگارێ دهۆكێ پیرۆزباهی ل یانەیا زاخۆ كر و بەلاڤ كرییە، پیرۆزباهییەكا گەرم ل پشتەڤانێن یانەیا زاخۆ و هەموو خەلكێ كوردستانێ دكەم كو خەلاتێ باشترین پشتەڤان ژلایێ فیفایێ پێ هاتیە بەخشین، سوپاس بۆ هەموو وان كەسێن دەنگ داینە هاندەرێن زاخۆ تا كو پشتەڤانێن یانەیا زاخۆ ببنە ئێكەمێن جیهانی.
لەقا ئێك دەستخوەشی و پیرۆزباهی بەلاڤكر
ژلایێ خوەڤە لەقا ئێك یا پارتی دیموكراتی كوردستان پیرۆزباهییا یانەیا زاخۆ كر و بەلاڤكرییە، ب شانازییەکا مهزن ڤە، دەنگوباسێ ب دەستڤەئینانا خەڵاتێ باشترین هاندەر ل سەر ئاستێ جیهانێ ژ لایێ فیدراسیۆنا نێودەوڵەتییا تەپاپێ (FIFA) ڤە گەهشتە مە. ئەڤە دەستکەفتەکێ مێژوویی یە نە ب تنێ بۆ باژێرێ زاخۆ، بەڵکو بۆ تەڤایا کوردستانێ.
ئەڤ خەڵاتە بەلگەیە ل سەر وێ چەندێ کو جەماوەرێ زاخۆ نموونەیا بلند یا رەوشت، وەفاداری و پشتەڤانییا بێ مەرجە بۆ تیپا خۆ. هوین شیان ناڤێ زاخۆ و کوردستانێ ل ناڤ ناڤەندێن وەرزشی یێن جیهانێ ب بڵندی ڕابگرن، گەرمترین پیرۆزباهییا ل یانەیا زاخۆ، دەستەیا کارگێڕی، و ب تایبەتی ل هەمی هاندەرێن خۆشتڤی دکەین. هیڤیا مە ئەوە ئەڤ سەرکەفتنە ببیتە پالدەرەک بۆ دەستکەفتێن مەزنتر د پاشەڕۆژێ دا.
عەدنان دەرجال كەیفخوەشە ب دەستكەڤتێ
ژلایێ خوەڤە عەدنان دەرجال سەرۆكێ فدراسیۆنا فوتبۆلا ئیراقێ كەیفخوەشیا خوە دیاركر و پیرۆزباهی ل یانەیا زاخۆ كر گۆت: پیرۆزباهییا زاخۆ و جەماوەرێ وێ دكەم پشتی باشترینێن جیهانێ وەرگرتی، ئەڤ سەركەڤتنە بۆ هەموو ئیراقێ جهێ شانازیێ یە، ژ هەژی ڤی ناسناڤی بوون، پشتەڤانێن زاخۆ نموونەیا پشتەڤانێن سەرخوە و دلسۆزێن وەرزشێ نە دوور ژ سەركەڤتن و خوسارەتیان.
باشترین یاریزان ل سەر ئاستێ جیهانێ
ب فەرمی یێ فرەنسی عوسمان دیمبلی یاریزانێ یانەیا پاریس سانجێرمان بوو باشترین یاریزانێ جیهانێ كو دبیتە جارا ئێكێ د دیرۆكا فرەنسا دا یاریزانێ وی وەلاتی ببیتە باشترین یاریزان، ژلایەكێ دووڤە باشترین یاریزانا كچ بوو یا ئسپانی و یانەیا بەرشەلۆنا ئیتانا بۆنماتی كەت ئەوا بۆ جارا سێیێ یە دبیتە باشترینا جیهانێ.
ژلایێ خوەڤە باشترین ڕاهێنەر ل سەر ئاستێ كوڕان یێ ئسپانی لویس ئەنرێكی ڕاهێنەرێ یانەیا پاریس سانجێرمان یا فرەنسی بوو، باشترین ڕاهێنەر ل سەر ئاستێ كچان یا ئنگلتەرایێ و یانەیا ئارسنال، سارینا وێگمان.
هەروەسان باشترین گۆلپارێز ل سەر ئاستێ كوڕان یێ ئیتالی جیانلۆیجی دونارۆما- گۆلپارێزێ یانەیا مان ستی یا ئنگلتەرایێ، باشترین گۆلپارێز ل سەر ئاستێ كچان یا ئەنگلتەرایێ هانا هامبتۆن- گۆلپارێزا یانەیا چێلسی یا ئنگلتەرایێ.
یاریزانێ ئەرجەنتینی و یانەیا ئیندیبندینتی سانتیاگۆ مۆنتێل خەلاتێ بۆشكاك یێ جوانترین گۆل بدەستڤە ئینا، گۆلەكا جوان د خولا ئەرجەنتینێ دا تۆماركربوو، سەركەڤتییا كچ بۆ خەلاتێ باشترین گۆل -مارتا- یاریزانا مەكسیكی و یانەیا ئۆرلاندۆ براید لیزبیس ئۆفایی گۆل ل سەر گواتیمالا كریە.
