ئسرائیلێ پڕانیا داخوازیێن تۆم باراکی رەت کرن
بەرپرسەکێ وەزارەتا بەرگریێ یا ئسرائیلێ دیار کریە، تۆم باراک نوونەرێ ئەمریکا د کۆمبوونا ل گەل شاندێ ئسرائیلێ ب سەرۆکاتیا نەتانیاهۆیی دیار کریە، ئەمریکا ژ سیاسەتا نها یا ئسرائیلێ ل سووریێ گەلەک دلگرانە، بزاڤێن ئسرائیلێ بووینە ئەگەرێ ئالۆزیێن گەلەک مەزن ل سووریێ، ئەمریکا د رەوشا نها دا ئەحمەد شەرعی وەکو هەڤپەیمانێ خوە ل سووریێ دبینیت و دڤێت ئسرائیل ژی نەبیتە ئەگەرێ ئالۆزبوونا رەوشا سووریێ.
هەمان بەرپرسی دیار کریە ل دۆر غەزە و لوبنانێ ژی ئەمریکا داخواز ژ ئسرائیلێ کریە ئێرشێن خوە ل لوبنانێ سنوردار بکەت و ل غەزە ژی پێگیریێ ب رێککەفتنا بەری نها بکەت و ل هەمبەر دا نەتانیاهۆ ژی دیار کریە، ل سووریێ مەترسی ل سەر ئسرائیلێ هەنە و دێ ئسرائیل یا پێدڤی بۆ پاراستنا خوە کەت و ئێرشێن ئسرائیلێ ل دژی حزبوللا لوبنانێ و بەرپرسێن حەماسێ ژی دێ ب رەنگەکێ سنوردار بەردەوام بن و د سەرەدانا دووماهیا ڤێ مەهێ یا نەتانیاهۆیی بۆ ئەمریکا دا دێ هەموو بابەت هێنە ئێکلا کرن.
