پیرۆزییا ئالای
عەبدولستار سپینداری
دبێژن ئەلندێ پێنج سالی لدەف بابێ خویێ بەلێندەر روونشتە خوار، بابێ ئەو جیاوازیا دناڤبەرا قورئانا پیرۆز و هەر پەرتوکەکا دی بۆ شڕوڤەکر، دسەر وێ چەندێرا کو هەردو لاپەرێن کاغەزینە، بەلێ قورئان کەلامێ خودایە، هەر ژ زارۆکینیا خو ئەلندی رێز ل قورئانێ گرت؛ چنکو ئێك ژ پیرۆزیێن ئاینی یە.
ڕۆژ هاتن و چوون، ئەلند مەزن بوو و تەمەنێ وی گەهشتە یازدە سالیێ و ل پۆلا پێنجێ سەرەتاییە، مامۆستای گرنگیا ئالای بۆ هەمی قوتابیان شڕوڤەدکر و دیارکر کو ئالا یێ چوار رەنگە، رەنگێ سپی نیشانا ئاشتیێ یە، رەنگێ کەسك نیشانا کەسکاتی و ژیانێ یە، رەنگێ زەر نیشانا هێزێ یە و رەنگێ سۆر نیشانا خوینا شەهیدایە و بەراوردیا ئالای دگەل هەر پەرۆکەکێ دی ئەوە کو ئالا ناسناما گەلێن کوردستانێ یە و دڤێت ئەم هەمی ڤی ئالای وەکی چاڤێ خوو ب پارێزین.
ڕۆژەکێ ئەلند دگەل بابێ خۆ چوو سەر کاری، بەرێ خۆ ددەتێ پارچە ئەردەکێ (روکن) یێ دورپێچ کریە ب ئالایێ کوردستانێ و یێ بەرەڤاژیە و دناڤدا پالە یێ کاردکەن و ئالیێن ئالای یێن دریاین؛ رەنگێ سۆر یێل لبەر پیا و رەنگێ زەر یێ تژی تۆزا چیمەنتۆیێ بووی و رەنگێ کەسك بویە رەنگێ ئاخێ هندی کەڤن بوویە، دەمێ ئەڤ دیمەنە کەفتینە پێش چاڤێن ئەلندی، ئێکسەر ئەو ئالایە ژێڤەکر و وەرپێچا! بابێ وی گازیکرێ و گۆتێ کوڕێ من، تە بۆچی ژێڤەکر، ب خێرا ڤی ئالای پۆلیس ناهێنە سەر ئاڤاهی و ئەم کارێ خۆ دکەین. ئەلندی گۆتێ باب، ئالا ناسناما گەلێ مەیە و دڤێت ب جوانی بهێتە پاراستن، ئەرێ باب خەما تە ئالایە یان ئاڤاهی و بالایە؟!
