د پەنجەرەیا نهۆما دو یێ دا
دلدار محەمەد
دیمەنێ (1)
گڕنژین و قیریێن زارۆکان
زەلامەکێ تۆڕە.. بابەکێ ژار
گوهێن کەڕ و کەلەخێن گازیێن تژی هەوار.
دیمەنێ (2)
رەو رەوا سەیان
ستێران ژ خەو راکەت
ئەو کارکەرێ گەنج
بلۆکێن پشتا وی چەند دگرانن
ب تێلەفون و نامەیێن خۆ
دناڤ بێدەنگییێ دا
بارێن سەدجاران گران تر
ل پشتا خۆ دکەت.
دیمەنێ (3)
ئەو ژن چجارا ژ برسێ
نا نالیت
هەمی گاڤا
د سلینکێ دا
د کۆشا وێ دا
ددلی دا
لسەر مژویلانک و
ل ناڤ رەشکێن چاڤا
تژی خەم هەنە
ئەو ژنا هەنێ
خەما دخۆت
پێ تێردبیت
منەتا برسێ ل بەتەنێ
چەند بازنەکێ تەنگ و گرتی یە
چارە، زارۆکەکا بێ بابە
لبەر دەرێ نەخۆشخانێ
هێشتا نە وێ بخۆ نە ژی کەسێ
نە ئەو دیتی یه
نە ئەو نیاسی یه.
دیمەنێ (4)
زارۆکەکێ پۆلا ئێکێ
د هەڕیا کۆلانێ ڕا ئاسێ ما
نە ئەو و نەکەس نزانیت
بابێ وی ژی پینجی ساله
د هەڕیا رێیا ژیانێ دا ئاسێ مایە.
دیمەنێ (5)
دەستێن هەمیا د سەرئەڤرازن
باران نەباریت
مۆختارێ وی تاخێ هەڕی
چ زۆردارە
بتنێ بەردەرگەهێ خۆ یێ قێرکری.
