چو یاریزان نەهاتینە دوورئێخستن و گەشبینین دێ ب هێزتر ڤەگەڕین
قەیس وەیس:
د داخویانیەكێ دا سكرتێرێ یانەیا دهۆك یا وەرزشی و سەرپەرشتێ تیما فوتبۆلا ئەوا پشكدار د خولا ستێرێن ئیراقێ دا ئەو دەنگۆیێ ب دوورئێخستنا یاریزانەك یان دو یاریزانان د ناڤا تیمێ دا دوورە ژ ڕاستیێ و بۆ یارییا بهێت ژ خولێ گەشبینن دێ باشتر و ب هێزتر ڤەگەڕین.
زێدەتر جاسم محەمەد حاجی گۆت: سەرباری ڕاوەستیانا خولێ بۆ ماوەیێ نێزیكی مەهەكێ بوو ژبەر پشكدارییا هەلبژارتیێ ئیراقێ د كۆپا عەرەبی دا، لێ تیما مە ل دووڤ پلانەكا تایبەت یا كادرێ ڕاهێنانێ بەرهەڤیێن خوە د كرن و بەردەوامبوون ل سەر ڕاهێنانان و هەتا سێ یاریێن هەڤالینی هاتنە ئەنجامدان ژبۆ پركرنا وێ ڤالاتییا درێژ یا بهێنڤەدانێ، ب ئۆمێدین مە مفایەكێ باش ژێ وەرگرت و ڕاهێنەر و یاریزان شیان ئەوان كێماتیێن دناڤ تیمێ دا چارەسەربكەن تایبەت لایەتێ هونەری، تەكتیكی و دەرۆنی، ژبەر ڕاوەستیانێ كارتیكرنا خوە هەبوو.
هەروەسان ناڤهات ئەوچەندە ژی دیار كر چو یاریزان نە هاتینە دوورئێخستن و ئەو دەنگۆیێن دناڤا سۆشیال میدیایی و ڕاگەهاندنێ دا هاتینە بەلاڤكرن دوورن ژ ڕاستیێ وەكو فەرمی هیچ یاریزانەك نە هاتییە دوورئێخستن تایبەت هێش دەرگەهێ ڤەگوهاستنێن زڤستانێ نە هاتیە ڤەكرن و گۆت: یا ئەم نوكە بزاڤێ دكەین یاریزانەكێ هێرشبەر ب ساخلەتێن پیشەكاری و سۆپەر بن كو بینینە دناڤ ڕێزێن تیمێ دا و ئەڤەژی بڕێیا ڕازیبوونا كادرێ راهێنانێ یە و ژبۆ چارەسەركرنا هێلا هێرشبرنێ.
جاسم محەمەد حاجی گەشبینییا خوە دیاركر بۆ یاریێن داهاتی و گۆت: هێشتا ئەم یێ ل دەستپێكا خولێ بتنێ حەفت گەر چووینە مە باوەری ب تیما خوە هەیە بۆ یاریێن داهاتی دێ ب هێزتر و باشتر ڤەگەڕین، مە جەماوەرەكێ دلسۆز و حەز ژێكەر هەیە گەشبینن دێ سەركەڤتنێن مە د بەردەوامبن.
هەژی گۆتنێ یە تیما یانەیا دهۆك قارەمانا كۆپا ئیراقێ دێ یارییا خوە یا گەڕا هەشتێ ل سێ شەمبییا بهێت مێڤاندارییا یانەیا نەجەف كەت ئەوا نوكە ب كۆمكرنا پێنچ خالان ل ڕێزا 16ێ دهێت ژ حەفت یارییان سەركەڤتنەك، دو وەكهەڤی و چار خوسارەتی هەنە.
