نەهـ یانەیێن پارێزگەهێ چاڤەڕێ بوون و هاتە پاشئێخستن
هەرچەندە بڕیار بوو ل 25ێ ڤێ مەهێ دەست ب هەڤڕكیێن قارەمانییا پلیستانگ یا فوتسالا كوردستانێ ل سەر ئاستێ كچان ل پارێزگەها دهۆكێ هاتبە كرن، لێ ژبەر ئەگەرێن جودا بۆ دەستپێكا سالا بهێت هاتە پاشئێخستن.
ئەنیس بەرواری جێگرێ سەرۆكا یانەیا ئافرەتێن دهۆكێ بۆ رۆژنامەیا ئەڤرۆ دیار كر بڕیاربوو ل 25ی مەهێ دەست ب هەڤڕكیێن قارەمانییا فوتسالا كچان بۆ یانەیێن كوردستانی ل سەر ئاستێ تازەپێگەهشتییان هاتبا كرن، لێ ژ نشكەكێ ڤە هاتینە ئاگەهدار كرن ژبەرهوكارێن هونەری ئەڤ قارەمانییە هاتە پاشئێخستن بۆ دەستپێكا سالا بهێت بێ دیار كرنا ژڤانەكێ دەستنیشانكری و ئەڤە ژی كارتیكرنا خوە یا نەرێنی ل سەر بەرهەڤیێن مە كرینە.
هەروەسان گۆت: ل مەها خزیرانا بۆری ئەم هاتبووینە ئاگەهداركرن كو دێ قارەمانییەك ل سەر ئاستێ تازەپێگەهشتییان یا خولا فوتسالا كوردستانێ هێتە ئەنجامدان، وەكو كارگێری مە دەست ب دانانا پلانان بۆ ڤێ قارەمانیێ كربوو، ژڤانەك هاتە دانانا كو دێ ل مەها گۆلانێ هێتە كرن پشتی وی ب حەفتییەكێ هاتە هەلوەشاندن و بڕیارا دووماهیێ كو دا ل 25ێ ڤێ مەهێ هێتە كرن، ژ نشكەكێ ڤە هاتینە ئاگەهداركرن كو ئەڤ قارەمانییە هاتە پاشئێخستن بۆ سالا بهێت، سەرباری بەرهەڤیێن مە و چەند یانەیێن دی یێن بۆ پشكداریێ خوە ئامادەكرین، هیڤییا مە ئەوە ئەو ژڤانێ نوو دهێتە دانان دۆبارە نە هێتە پاشئێخستن.
هەژی گۆتنێ یە ل پارێزگەها دهۆكێ نەهـ یانەیان ل سەر ئاستێ تیمێن خوە یێن كچان بەرهەڤییا خوە دیار كربوو ژبۆ پشكداریێ د قارەمانیێ دا ئەوا دێ ل پارێزگەها دهۆكێ هێتە كرن.
