مایتكرنێن دەرەكی ئاریشە مەزنتر لێكرینە و ئەم زەرەرمەندێن ئێكێ نە
قەیس وەیس:
ل دووماهییا مەها خزیرانا ئەڤ سالە لژنەیا ئۆلمپییا ئیراقێ دەستەكا بەروەرخت بۆ فدراسیۆنا باسكێت بۆلا ئیراقێ ب سەرۆكاتییا عەلا بەحرئەلعلوم دانا پشتی دەستەیا پێشتر ب توومەتێن كەندەلیێ هاتییە هەلوەشاندن، بڕیاربوو وەرزێ نوو یێ خول و قارەمانییا بهێتە كرن لێ ژبەر ناكۆكییان هێشتا چو نە هاتییە كرن، لدۆر ڤێ یەكێ و كارتیكرنێن وێ ل سەر یانەیان رۆژنامەیا ئەڤرۆ بۆچوونێن جودا وەرگرتینە و بڤی شێوەیی بوویە.
جوتیار عەلی ڕاهێنەرێ بەرنیاس و یانەیا زاخۆ دیار گر ئەو ناكۆكیێن دناڤبەرا كەسان دا ل فدراسیۆنێ و لژنەیا ئۆلمیی و وەزارەتا وەرزشی ژلایەكی و دگەل هاكۆپ خاریجیان بەرپرسێ ئێكێ یێ بادەكا ئاسیایی دفدراسیۆنا جیهانی دا بوویە ئەگەر كارتیكرنا خوە ل سەر بەرهەڤیێن مە بكەت و بێزارییەك پەیدا كرییە، مایتكرنێن دەرەكی مەزنترین ئاریشە بۆ مە پەیدا كرینە.
هەروەسان ناڤهاتی گۆت: د ماوەیێ بۆری دا كارگێرییا بەروەرخت هندەك چالاكی ئەنجامدابوون و پشكدارییا هەلبژارتیێ ئیراقێ د ڤاڤارتنێن مۆندیالێ و ئاسیا دا پشكدار كربوو، دبیت ئەڤە ژی ئەگەرەكێ یێ ناكۆكیان بیت لێ بڕیاربوو ل دەسپێكا چرییا ئیكێ یا بۆری وەرزێ نوو یێ خول و قارەمانیێن ئیراقێ بهێنە كرن، لێ ب هەر بوهانە دهاتنە پاشئێخستن، ئەم زەرەڕمەندێن ئێكێ نە ژبەركو پێشتر مە بەرهەڤی كرن و یاریزان بەردەوام دهاتنە ڕاهێنانان هەكە بڤی شێوەیی بیت ئیدی باسكێت بۆلا ئیراقێ ژی نامینت و هیڤیێن یاریزانێن مە دێ تێكچن، هیڤییا مە ئەوە چارەسەریەك پەیدابیت و بگەنە ڕێكەڤتنێ.
ژلایێ خوەڤە فەرید ڕەعدی یاریزانێ پارێزگەهێ و یانەیا كەرخ یا بەغدایی و هەلبژارتیێ ئیراقێ گۆت: ژبەر هەبوونا ئەڤان ئاریشەیان و مایتكرنێ وەكو یاریزانێن هەلبژارتیێ ئیراقێ مە خرڤەبوونەك ل بارەگایێ لژنەیا ئۆلمپییا ئیراقێ كربوو و مە داخواز كر بهێنە دناڤ بابەتی دا و چارەسەر كەن، باسكێت بۆل یا تووشی زیانێن مەزن دبیت ژبەر ئەگەرێ مایتكرنا دەرەكی و كارتیكرن ل سەر كارێ كارگێرییا كاتی یا فدراسیۆنێ كرییە، هەروەسان كارتیكرنا نەرێنی ل سەر ئاست و دەرۆنێ یاریزانان ژی كریە، هەكە مایتكرن بەردەوامبن دخوازین كارگێرییەكا دی یا پێشوەخت هەبیت ژبۆ قورتالكرنا ڤێ ئاریشێ و دوبارە وەرزشا باسكێت بۆلێ ڤەگەڕیت، ئەڤە دێ سالا 2025ێ ب دووماهی هێت هێشتا ژڤانێ خولێ نە هاتییە دیاركرن.
