شەهید حسنی بوو ئێكەمێ ئیراقێ و هیڤیێن مەزنتر هەنە
دلۆڤان هەلۆ:
كوڕێ باژێرێ زاخۆ شەهید حسنی خەلیفە یاریزانێ یانەیا ئەمانەت بەغدا پلا ئێكێ ل سەر ئاستێ ئیراقێ بۆ یارییا خوەلێگدانا ئازاد ب دەستڤە ئینا، پشتی شیایی د یارییا دووماهییا قارەمانییا ئیراقێ ل سەر ئاستێ پێشكەڤتیان سەركەڤتنێ ل سەر هەڤڕكێ خوە یێ یانەیا شورتە بینت، د هەڤركیێن واندا ئەو ب پشكدارییا 22 یانەیێن هەرێمێ و ئیراقێ ل پایتەختێ ئیراقێ بەغدا هاتیە كرن.
ل دۆر ڤێ دەستكەڤتێ شەهید حسنی بۆ رۆژنامەیا ئەڤرۆ گۆت: گەلەك پێخوەشحالم وەكو كوردستانیەك و خەلكێ باژێرێ زاخۆ ناسناڤێ یارییا خوەلێگدانێ بۆ وەرزێ 2025ێ ب دەستڤە بینم كو ئەڤە ژی نە جارا ئێكێ یە بەلكو ڕیكۆردە و جارا هەشتێ یە ل سەر ئاستێ ئێراقێ ببمە یێ ئێكێ، هەروەسان بەردەوامیێ بدەمە مانا خوە دگەل هەلبژارتیێ ئیراقێ بۆ قارەمانیێن 2026ێ پشكداریێ تێدا بكەم.
ژلایەكێ دووڤە ناڤهاتی گۆت: ئێك ژ ب هێزترین قارەمانیێن ئەڤ سالە بوون ژبەركو دووماهی هەڤڕكی بوون و دەرگەهەك بوو پێخەمەت یاریزان ب گەهیتە ناڤ ڕێزێن هەلبژارتیێ ئیراقێ دا، لەوما ژی باشترین یاریزانێن ئیراقێ و هەرێمێ تێدا پشكداربوون و هیڤیێن من مەزنترن بۆ قارەمانیێن دەرڤە.
شەهید حسنی هیڤی خواست یانەیا زاخۆ پشتەڤانییەكا باشتر ل یاریزانا بكەت و گۆت: ژبەر نەبوونا پشتەڤانیێ نەچاربوویمە ئەز یاریێ بۆ یانەیا ئەمانەت بەغدا بكەم، مە ل زاخۆ شەنگستەكێ ب هێز یێ ڤێ یاریێ هەیە د ژیێ بچووك هەتا پێشكەڤتیان لێ مخابن نەبوونا پشتەڤانیێ وەكرییە ئەو ڕێبازا یارییا خوەلێگدانێ ئاستەنگ ب كەڤنێ و چاڤەرێ پشتەڤانیێ بیت.
