پڕۆژەیەكێ وەبەرهێنانێ ل زاخۆ 200 دەلیڤەیێن كاری بۆ گەنجان پەیدا كرینە
زاخۆ، دلۆڤان هالۆ:
ڕێڤەبەرێ گشتی یێ وەبەرهێنانێ ل ئیدارەیا سەربخوە یا زاخۆ بۆ ڕۆژناما ئەڤرۆ دیار كر، ب ڤەكرنا پڕۆژەیەكێ وەبەرهێنانێ د كەرتێ ساخلەمیێ دا ل گۆندێ دەشتمرێ ل ئیدارەیا سەربخوە یا زاخۆ 200 دەلیڤەیێن كاری بۆ كۆر و كچێن سنۆرێ ئیدارەیا سەربخوە یا زاخۆ پەیدا كرینە.
ڕێڤەبەرێ گشتیێ وەبەرهێنانێ ل ئیدارەیا سەربخوە یا زاخۆ، ئاماژە ب وێ چەندێ ژی كر، ئەڤ پڕۆژە نەخوەشخانەیەكا تایبەتە ب ناڤێ نەخوەشخانا زاخۆ یا تایبەت، ئەڤ نەخوەشخانە ل دووڤ ستاندەرێن جیهانی و سەردەمیانە هاتیە دروستكرن و كەفتیە د خزمەتا وەلاتیێن دەڤەرێ دا.
گۆت ژی:”ئەڤ نەخوەشخانە پێك دهێت ژ كلینێكێن نۆژداران و پشكا هاوار هاتنێ و پشكا چاڤدێریا چڕ و پشكا زاڕۆكبوونێ و چارەسەریا سرۆشتی، هەر دیسان چەندین بەشێن دی ل ڤێ نەخوەشخانێ هەنە وەكو ژ ژوورا نشتەگەریان و ژوورا نەخوەشان و تاقیگەهـ و دەرمانخانە و تیشك”.
