پڕۆژەیێ «ئۆمێدەكا نوی ژبۆ فێركەرێن نیشتیمانی» هاتە ڕاگەهاندن
ب چاڤدێری و ئامادەبوونا د. عەلی تەتەر، پارێزگارێ دهۆكێ و عومەر عەلی تەها، ڕێڤەبەرێ گشتی یێ پەروەردەیا دهۆكێ و سەلام حەسۆ، ڕێڤەبەرێ گشتیێ پەروەردەیا ئیدارا سەربخۆ یا زاخۆ و یوسف سەبری، نوونەرێ لقێ ئێك یێ پارتی و سەروەر رەئوف، بەرپرسێ لقێ دهۆك یێ ئێكەتیا مامۆستایێن كۆردستانێ و هەژمارەكا مامۆستا و ڕێڤەبەرێن پەروەردە و قوتابخانەیان، دوهی 23/12/2025 ل هۆلا پەروەردەیا دەڤەرداریا دهۆك، ڕۆژهەلات ئێكەتیا مامۆستایێن كۆردستانێ لقێ دهۆك ب هەڤكاری ل گەل چەند سازیێن جودا پڕۆژەیێ «ئۆمێدەكا نویی ژبۆ فێركەرێن نیشتیمانی» ڕاگەهاند، پڕۆژەیێ ناڤبری داشكاندنان ب ڕێژەیێن جودا بۆ مامۆستا و خێزانێن وان ل چەند كۆمپانیان و سەندیكا و كۆمەلگەهێن نۆشداری و نەخۆشخانە و تاقیگەهان و دەرمانخانە و بازاڕان و نۆشدارێن تایبەتمەند و خوارنگەهان و هۆلێن هەلكەفتان و نڤیسینگەهێن شۆفێرییێ و وێنەگریان و پێشانگەهان بخۆڤە دگریت.
پارێزگارێ دهۆكێ د پەیڤەكێ دا دەستخۆشی ل ئێكەتیا مۆستایێن كوردستانێ و هەمی جهێن د پڕۆژەی دا پشكدار كر و خواست بەردەوامی ب ئەڤان جۆرە پڕۆژەیان بهێتە دان و گۆت: «ڕێزگرتن ل مامۆستایان، رێزگرتنە ل هەمی كۆمەلگەهێ و كارێ مامۆستای پیرۆزترین كارە و پێدڤیە ڕێزەكا تایبەت ل مامۆستایان بهێتە گرتن، چونكی جڤاكێن هشیار و ئاڤا و پێگەهاندی ل ژێر پەروەردەیا وان گەشێ دكەن، پاشی بەحسێ گرنگیا كەرتێ پەروەردەیێ ب شێوەیەكێ گشتی و پێگەهاندنا جڤاكی د بیاڤێن جودا دا، ب تایبەت د بیاڤێ حەژێكرنا نیشتیمانی و ڕێزگرتن ل ئاخ و ئالا و پیرۆزیێن وەلاتی كر و پشتەڤانیا ئیدارا پارێزگەهێ بۆ ڤان جۆرە پڕۆژەیان دووپاتكر».
